Myanmar sipaite chuan anmahni ram mite ngei beih nan ralthuam chi hrang hrang thahnem tak an hmang a, heng ralthuamte hi ram 13 vela company hrang hrangte atanga an dawn khawm niin UN thuneitu sang tak lo ni tawh thinin a sawi.
Khawthlang ramten an kawmserh mek laiin ralthuam chawk luh nan hian US, France, India leh Japan bakah ram dang eng emaw zata company-te siam an hmang nia sawi a ni.
Myanmar-ah hian February, 2021 khan sipaiten mipui sorkar paih thlain thuneihna an chang a, hemi hnuah hian tharum thawhna leh buaina a thleng nasa hle.
Sipai rorelna duh lotute chuan hnam bila sorkar laka thil phut neia beitu pawlte zawmin sipai sorkar nên na takin an inep mek.
Special Advisory Council on Myanmar-in report a siamah chuan UN member ram tam takin sipaite hnenah hian ralthuam an la hralh reng tih tar lan a ni.
Firm-te hian Myanmar-a sipaite hnenah hian raw material, khawl leh training pein an leitir niin report-ah hian tar lan a ni a. Heng ralthuamte hi an ramri ven nan ni lovin, mi suat nan leh tihthaih nan an hmang thin zawk nia tar lan a ni.“Myanmar hi ram dang tumahin an nei ngai lo,” tiin UN-a Special Rapporteur on Human Rights ni thin, report siamtute zinga pakhat ni bawk, Yanghang Lee chuan a sawi.
“Myanmar hian ralthuam a hralh ngai lo bawk a. Kum 1950 atang khan ama mite ngei laka a hman turin ralthuam a siam thin,” a ti bawk.
Sipaiten thuneihna an chan leh hnuah hian anmahni dodaltu mi 2,600 chuang thi tawh anga chhinchhiah a ni a; mahse, a tak takah chuan he mi let 10 zet hi an tlin rin a ni.
Ram hrang hrangin an hrek leh kawm serh avangin Myanmar-a roreltuten ralthuam a siam an chawlh phah lo va. Sniper rifle, thlawhna kahna, missile kah chhuahna, grenade, bomb leh chilpuah bomb an la siam reng.