United Nations Security Council (UNSC) chuan Thawhtanni khan Pakistan-a awm, Abdul Rehman Makki chu ISIL (Da’esh) & Al-Qaida Sanctions Committee hmangin khawvel huap mi firfiak, global terrorist-ah a puang ta.
Nikum khan India-in Lashkar-e-Taiba (LeT) hruaitu hi global terrorist-a puang tura nawr tawhin China chuan a dang.
June, 2022 khan India hian UNSC 1267 Committee hnena mi firfiakte zinga telh tura Makki-a a rawtna China-in a dan avang hian a lungawi loh thu pawh a lo sawi tawh.
UN chuan Thawhtannia thuchhuah a siamah Makki-a hi dan hrang hrang tlawhchhanin khawvel huap mi firfiak zingah a telh ta tih a tar lang a ni.
India leh US chuan Makki-a hi anmahni dan hmangin mi firfiak zingah an lo telh tawh sa a ni a. Sum a tuak a, thalaite ho khawmin India-a tharum thawhna thlen turin a hmin a, a bikin Jammu & Kashmir-ah a hote hi a chettir nasa zual.
Makki-a hi Lashkar-e-Taiba (LeT) chief leh 26/11 attacks thluak bur, Hafiz Saeed-a nena innuphal an ni a. US-in Foreign Terrorist Organization (FTO)-in firfiak pawla a chhal, LeT-ah hian hotu nihna hrang hrang a lo chelh tawh a, hma an lakna tura sum tuaknaah a inhnamhnawih nasa hle bawk.
Kum 2020 khan Pakistani anti-terrorism court chuan Makki-a hi firfiaka chetna leh suma a puihna avanga thiam loh chantirin lung inah khung a lo ni tawh tih US State Department chuan a sawi.
A hmain China hian Pakistan-a awm nghette mi firfiaka puan tumna hi an dal nasa thin a. UN-in a lo puan tawh, Jaish-e-Mohammed (JeM) chief Maulana Masood Azhar-a pawh mi firfiaka puang turin rei tak a lo tikhawtlai tawh a ni.