China-a mihring cheng zat chu kum 60 hnua a vawi khat nan a hniam zawngin a kal a, nikum chhung khan mi 1,000 zelah nau piang thar 6.77 chauh awmin a tlem ber tum a ni.
Kum 2022-ah khan mihring tluklehdingawn 1.4118 awmin kum 2021 aiin mi 8,50,000 zetin an tlem zawk a ni.
China-ah hian kum tam tak chu nau piang zat bi (birth rate) hi a hniam zawngin a kal tawh a, hei hi tihtawp tumin policy duang mah se rah tha a la chhuah thei lo.
Kum sarih kal taah khan nupain fa pakhat chauh neih phal an tih thin chu an lo hlip tawh a, heti chung hian ‘a tlem zawng zel thovin an kal’ tih thuneitu sang pakhat chuan a sawi.
Kum 2021-ah khan birth rate chu 7.52 niin kum 2022-ah an phak lo niin Thawhlehnia National Bureau of Statistics an tihchhuahah tar lan a ni.
Kum 2021-ah khan US-ah chuan mi 1,000 zelah nau 11.06 an piang, UK-ah 10.08 an piang bawk a. Mihring cheng tam lama China khum mai thei tawh, India-ah phei chuan 16.42 lai an piang.
China-ah hian a vawi khat nan nikum khan nau piang zat aiin thi a ram zawk bawk a.
Kum 1976 hnua thi zat bi (death rate) a san ber tum tawngin mi 1,000 zelah 7.37 an thi a. A hma kum khan 7.18 niin an khum bawk.