Aizawl : Ministry of Defence hnuaia National Defence College (NDC), New Delhi-a training lai sipai hotulu te leh faculty ten tun thla tawp hian Mizoram an tlawh dawn a, anmahni lo dawnsawn dan tur ngaihtuahin nimin khan Home Secretary Lalengmawia hovin a kaihhnawih mipawimawhte an thukhawm.
Sorkar thuchhuahin a tarlan danin NDC hian India ram hmun hrang hranga chengte nunphung zirchiang turin -Understanding India Study tour- an nei mek a. An tlawh tur zingah Mizoram pawh thlan tel niin, Mizoram an tlawh hun chhung tur hi tun thla ni 29 atanga February ni 4 thleng ruahman a ni a. District pathum – Aizawl, Serchhip leh Kolasib te an tlawh ang.
NDC-a training lai leh defence mipawimawh Mizoram tlawh tur te hi mi 18 niin, NDC-a faculty Major General Hari B. Pillai chuan a ho dawn niin sorkar thuchhuah chuan a tarlang bawk.