Barcelona in an starting XI-ah player rinrawl an neih thenkhat an awltir chungin Copa del Rey quarter-final luh an harsat lova. Spain a third division team AD Ceuta FC 5-0 in an hneh.
Ningani zanah Estadio Alfonso Murube-ah round of 16 inkhel hi nghah a ni a. Khelmual neitute hi Primera División RFEF – Group 1 a khel lai an ni.
Barcelona in Supercopa de España final a Real Madrid hnehtu team atangin striker Robert Lewandowski tih loh chu an kh thlak a. Goal khung nghal mai lo mahse goal khatna an neih hnuah an chungnung zual.
Raphinha chuan halftime hma in an goal hmahruai a khung a. Lewandowski-a’n goal hnih a khung inkarah Ansu Fati leh Franck Kessie ten second half-ah goal an khung ve bawk.
Barca manager Xavi Hernandez chuan, “Round hmasa-ah Iakah tha kan thlah chuan a pawi theihzia kan hmu a. Chuvangin zaninah kan team an tang tluan parh kha a fakawm hle.” tiin a team a fak.
Blancos an chak
Inkhel dangah Real Madrid in El Madrigal-ah Villarreal lakah goal hnih chhuah hmasa mahse 3-2 in ‘comeback’ hnehna an chang.
Villarreal in Étienne Capoue leh Samu Chukwueze te goal khung hmangin first half-ah goal hnihin hma an hruai a. An dinhmun a tha hman.
Nimahsela Real substitute Dani Ceballos chu inkhel thlak danglamtu niin Vinícius Júnior goal khung tur siamsaktu a ni a. Eder Militao si phurh sutna bul tantu ni bawkin minute 86-naah aman an chakna goal a khung.
Madrid manager Carlo Ancelotti chuan, “Halftime laiin ka thin a ur hle. Goal an khung hma a, tlarhnung atang ball an la chhuak thiam thin bawk. Keini lamin ball kan chuh na lova, tihsual kan ngah hle a ni.” tiin first half a an inkhel a sawisel.