AZL: Mizoram PWD hotute leh Central YMA hruaituten nimin khan Reiek kai, Tlawng luia lei (bug bridge) dawh hna thawh mek an en fiah a. Contractor hnenah hun tiam chhunga chak taka hna thawk zo turin an hrilh.
Reiek kaia lei dawh hna thawk mek hi Sadguru Engineer & Allied Services Pvt. Ltd., Assam ten an thawk a. Hna thawktu (contractor)-te hian an thawh muan em avangin leh an zawh hun tura an intiamna hnuhnung ber chu February 28, 2023 ni mah se, tuna a lan danin thawh zawk hun tura an intiam hun chhung hian hna an zawh hman dawn loha a lan avangin an enfiah a ni.
Central YMA hruaitute sawi danin Reiek kai Tlawng lei siam hna hi February 8, 2017 khan MPWD leh Sadguru Engineer & Allied Services Pvt. Ltd., Assam ten inremna an siam a. February 28, 2019-a zo tura tih an ni.
Harsatna hrang hrang avangin hna thawh hun chhung hi May 31, 2021 thleng pawh seisak leh an ni a. Kut thlakna hmuh tur mumal a awm loh avangin contractor hnenah hian show cause Notice pawh Division level atangin tum hnih leh Superintending Engineer (Central Circle) atangin tum khat pek a ni tawh a. Management meeting hnuhnung berah Contractor hian February 28, 2023-a hna thawh zawh a intiam a ni. Tuna an hna thawh dan en hian, an hun tiam chhung hian he lei hi dawh zawh theih niin a lang lo a. A tul ang anga nawr zui an tum tur thu an sawi.
He hunah hian PWD atangin Lalbiaksangi, EE hoin Aizawl Road South Division SDO leh thawktu dangte an kal a. Central YMA Central YMA Vice President Lalhmachhuana hoin CEC member pathum, Khuangchera Group YMA, Reiek Branch leh Ailawng Branch YMA hruaitute an kal a ni. hna thawh kal mêk hi a hmunah an en ho a ni.