Chief Minister Zoramthanga chuan Pawl Kût lawm leh hman chu chhunzawm zel tha a tih thu sawiin naupang leh thangtharten a pawimawhna tam tak an hriat a beisei tih a sawi.
Ni hnih awh Lammuala neih Pawl Kût chu Inrinni khan kharna hun hman a ni a. He huna thusawitu, Kût Pa Zoramthanga, Chief Minister chuan Pawl Kût chu naupang pual a nih ang ngeia naupangten Mizo thil an entir chu lawmawm a tih thu a sawi.
Naupang tam takin Mizo hnam nunphunga thawnthute hian zirtir ropui leh tha tak tak an neihte an hre leh zel chu naupang tan a hlawk leh zual nia a hriat thu a sawi a. “Hmalaia Mizote chanchin leh an nun dana zir tur tam tak a awm a, hengte hi thangtharte kan zirtir leh hrilh a pawimawh a, chutiang atan chuan Pawl Kût chu hmang tangkai tha a ni,” a ti.
Khualzahawm, Art & Culture Minister R. Lalzirliana chuan Mizo piputen naupang puala kût an neih kha hmanlai Mizoten naupang an ngaih pawimawh leh an ngaihhlutzia a tilang chiang hle niin a sawi a. Hnam nunphung leh ziarang zirtirna kalpui chu thil pawimawh tak niin, changkanna leh hmasawnna hrang hrang avangin naupang leh thangtharten Mizo hnam chin dan tha te, hnam ziarang leh culture hi an hre chang thei lo vang tih a hlauhthawn awm avangin hetiang hun buatsaih leh hman hi thil tul tak nia a hriat thu a sawi.
Social Welfare & Tribal Affairs Department bul tuma hman Pawl Kût 2023-ah hian middle leh high school zirlaiten hnam lâm an entir a, a huhoa cheraw kân te leh Mizo thawnthu lemchan te an entir a. Mizo infiamna chi hrang hrang 12-ah sikul naupang tan inelna siam a nih bakah chheih lâm intihsiakna neih niin, naupangten Mizo infiamna hrang hrang an hriat theih nan pho chhuah a nih bakah naupangte tan intihhlimna leh infiamna chi hrang hrang chhawpchhuah a ni bawk.