Congress leh CPI-M kaihhruai Left party-te chuan Inrinni khan Agartala, Tripura-ah inthlan lo awm tur boruakah tharum thawhna thleng thin a tawp nan leh inthlanna chu zalen, dik leh langtlang a nih theih duhin kawng zawh an huaihawt.
Tripura assembly inthlanpui hi February 16-ah neih a ni dawn a ni.
Tun tum anga party pahnihin a ruala kawng an zawh hi Tripura-a a thlen vawi khatna a ni a, heng party pahnih hi kum 1952 atang tawh khan inel ngar ngar an lo ni tawh.
Kawng zawhah hian Tripura chief minister vawi li lo ni tawh leh CPI-M politburo member Manik Sarkar, party state secretary Jitendra Chowdhury, Tripura state Congress President Birajit Sinha, AICC Tripura in-charge Ajay Kumar, Congress MLA awmchhun Sudip Roy Barman, a pa leh chief minister hlui Samir Ranjan Barman bakah AICC secretary Szarita Laitphlang te pawh an tel.
Banner leh placard an kenah chuan ‘My Vote, My Right’, ‘Stop Poll Violence’ tih te a inziak a. Congress leh Left Front hruaitu, member leh worker sang tel telin hnam puanzar pawh an keng lang nasa hle.
Kawng zawh tawp hniah hian party pasarih — Congress, CPI-M, CPI, RSP, Forward Bloc, CPI (ML) leh Tripura People’s Party hruaitute chuan Tripura Chief Electoral Officer (CEO) Gitte Kirankumar Dinkarrao leh police hotu liante an hmu zui nghal.
Heng party-te hian inthlan kaihhnawiha tharum thawhna, a bikin eptu mi leh sa laka thleng chu tihtawp ngei an phut a ni.