Line of Actual Control (LAC) khawchhak lama China nena boruak inmung mek avangin Indian Air Force (IAF) chuan Arunachal Pradesh, Assam leh hmarchhak state dangah nunchan (air combat exercise) an zir dawn.
February chawlhkar hmasa bera nunchan zir turah hian indo thlawhna, helicopter, thlawhna dang leh drone te pawh an tel dawn niin Times of India chanchinbu chuan a tar lang.
Shillong-a hmunpui nei, Eastern Air Command hian February 1 leh 5 inkar hian beihpui thlak atana inbuatsaihin nunchan an zir dawn tih tar lan a ni.
TOI-in a tar lan dan chuan he nunchan zirnaah hian, ‘eastern sector-in a neih zawng zawng, Rafale leh Sukhoi-30MKI fighter te pawh Hasimara, Tezpur, leh Chabua atanga thawk chhuakin an tel dawn’ a ni.
December 9-a Tangtse, Tawang sector, Arunachal Pradesh-a Indian and Chinese sipaite an innawr deuh hnuah khan December thla khan IAF chuan hmarchhakah hian ni hnih chhung drill a lo huaihawt tawh bawk.
“Nunchan zir lo awm tur hi chu huang zau leh lian zawka kalpui tur a ni a, hmanrua pawh chi hrang – C-130J ‘Super Hercules’ thlawhna, Chinook heavy-lift leh Apache attack helicopter te pawh chhuahpui an ni dawn,” tiin chanchinbu hian a tar lang.
China hian thlasik vawi thum a zawnin Ladakh khawchhak lama ramri-ah sipai 50,000 chuang leh ralthuam tam tak a chhawp tawh a, Depsang Plain leh Demchok vel atanga sipai hnuhdawh chu a duh lo.
Indian leh Chinese sipaite hi LAC hrul, Tawang sector-ah hian December 9 khan an lo innawr deuh tawh a, hliam tenau tuar pawh an awm.
He thil thlengah hian Indian sipaiparukin hliam an tuar a ni.