Peru ram mipuiten an president thar duh lohna nasa tak an lantirna kal mek zel avangin an rama khualzinte tlawh thin hmun lar, Machu Picchu chu tuamchin awm lova khar phah a ni.
Sorkar chuan khualzin leh he hmun tlawhtu an mite him zawk nan a khar a, a hmun an panna, Inca trail hike an tih pawh an khar.
Kum zabi 15-na laia mi Inca citadel-ah hian darkar eng emaw zat mi an lo tang tawh a, chhan chhuah erawh an ni tawh.
Peru-a tharum thawhna nena duh lohna lantirah hian mi eng emaw zat an thi tawh a, buaina hi an hruaitu hmasa chiah paih thlak a nih atanga intan a ni.
Lungawi lohna lantirtuten rel kawng an tihchhiat avangin Ningani pawh khan Machu Picchu pan rel chhuak tur chu thulhtir a lo ni tawh.
Tourism Minister Luis Fernando Helguero chuan mi 418 tan phahin chhan chhuah erawh an ni tawh tih Inrinnia thuthar lakhawmtute a kawmnaah a sawi.
Inrinni zan khan tourism ministry pawhin ram dang mi 148 leh Peruvian 270-te chu rel leh bus hmanga him taka lak chhuah an nih thu a puang bawk.
Buaina chhuak avang hian thla hmasa khan khualzin eng emaw zat chu Machu Picchu-ah hian ni eng emaw zat an lo tang tawh a, thlawhnaa hruai chhuah an ni.
Andes tlang sanga awm, Machu Picchu hi ‘seven wonders of the world’ zinga mi niin khualzin a hip em em a. Kum tin mi maktaduai tel tlawhtu an awm ziah a ni.