- HC Vanlalruata
Aizawl Chanmari veng khawtlang hruaitute chuan thil ţha leh tunlai a kan nundan nena inmil zet mai an rawn rawt chhuak a. Chanmari Local Council, an veng chhunga tlawmngai pawl hrang hrangte leh kohhran hrang hrang aiawh kalkhawmte chuan mitthi an awmin in lama mitthi vui ţhin chu kohhran hall-ah vui vek tawh ni se, tiin an rel a ni. He thutlukna hi thil pawimawh leh tihawm tak a nih bakah kan nunphung inthlak chho zel nena inhne rem tak tur a ni ngat mai.
Mizote’n mahni chenna ina mitthi kan vui chhoh aţanga hun rei tak chhung chu vantlang punkhawmna atan in lian tak kan nei ngai lova. Aizawl leh khawpui dang veng hrang hrang bakah khaw hrang hranga community hall an tih mai kan neih leh YMA hall kan neih kim deuh vek hi tun hnai a ni. Kohhran hrang hrangin biakin an sak a, kawng-ăn a dawr tur siama thlatin man chawi a an luahtir leh Kohhran/Biakin hall an sak tel takna hi a la rei hauh lo.
Keini hriat ve phak takngialah pawh Aizawla kohhran biakin tam tak a hall ang reng an neih kha chu lehkhabu dahna nena an kaihkawp ‘vestry’ an tih mai zim te te kha a ni mai a. Khatah khan kohhran dan khatna a innei pha lote an inkutsuih ve ţhin a, a zau viau lo. Hman ţangkai erawh a hlawh viau a, dan khatna tlin lote inneihna bakah thawhlawm chhiarna atan leh kohhran committee ţhutkhawmna atante, Sande Sikul enlawkna atante hman ţhin a ni.
Hun a lo kal zel a. Biakin hnuaiah emaw a remchan dan angin kohhran hall siam kan uar ta a. Kum 1994-a Mizorama chanchinţha lo thlen kum za tlinna kan lawm aţang phei kha chuan ‘Centenary Hall’ vuah a kohhran biakin hnuai emaw ngheng emaw a kohhran hall siam kan uar ta hle mai. Hei hi hman ţangkai a ni chungin thingtlang khaw ţhenkhat a an community/YMA hall an hmang khat em em ang deuhva, hman ţangkai lutuk loh a awm thei bawk.
Khua/veng community hall/YMA hall hi hmun tam takah chuan YMA member ni tharte lawmna leh YMA Day lawmna atan bak chuan inthlan dawn hnaih a political party leh candidate-te vantlang inkhawm huaihawtna atan tih loh hmanna a tam viau lova. A chhunga ţhalai infiamna hmun an ruahman tel loh phei chuan a thing ţhuap hian a hriat. A sakna atana sum sen ngaihtuah phei chuan a pamhmai lek lek hlawm a ni.
Kohhran hall pawh hi a tir lamah chuan Krismas leh kum thar ruaiţhehna bakah bial inkhawmpui palaite ruaţhehna (thingpui ruai tiamin) atan kan hmang ţangkai a, kohhran lian deuh phei chuan Presbytery leh Synod inkhawmpui-ah te pawh an hmang ţangkai a. Presbyterian chauh lo kohhran dangte pawhin hetiang hian an hmang ţangkai ta zel a nih hi. Heta kan sawi kim loh pawh hi kohhran thil pawimawh dangah a la awm zel awm a sin.
Biakin hawnga innei pha velote inneihna hmunah leh biakin hawng leh hawng lo inneite inneih hnu a inkhawm hranpa (sapţawng taka ‘reception’/joint reception’ kan tih tak huaihawtna hmun bakah ruai ţhehna hmunahte kan hmang a. Kohhran member thite lungphun inkhawmna leh ruaiţhehna atan kan hmang bawk a. Krismas leh kum thar lenkhawmna atan kan hmang ta zel bawk a. Kan hmang ţangkai thawkhat ta a, a lawmawm hle.
Covid-19 hrilen zual lai khan sorkar duhdan angin vantlang hall-a invui kha kan ching ţan a. A ţha hle. Sorkarin khatianga a tih chhan kha chu mitthi in chep deuhva inhnawh chuan mihring a inhlat tak tak theih loh avangin hri kan inkaidarh ang tih hlauhna a ni a. Vantlang hall zau zawkah chuan inhlat deuhva a ţhut theih vang a ni. Kha kha veng leh khaw tam tak chuan an chhunzawm niin a lang a, mahse, chhunzawm ta lo an tam zawkin a rinawm.
Kohhran a kohhran hruaitu pastor leh kohhran upate rawngbawlna zingah hian biakin inkhawmna a thusawi leh chanvo neihte bakah chuan inneihtir leh mitthi vui hi rawngbawlna pawimawh zinga tel a ni. Pastor leh kohhran upate mihring zinga a bik nihna pe a, an ruang biakina kan lakluh bik lai a, midang ruang kohhran biakin hall-a lakluh hreh ni-awm taka kan la awm reng mai hi a zia lo takzet a ni. Inneihna pawh kohhran biakin hawng an nih loh pawh a ‘Vestry’ emaw a thlaktu kohhran/biakin hall-a kan tih lai a, rawngbawlna pawimawh em ema ngaih ve tho, mihring hun tawp tak meuhva an ruang biakin hall-ah tal pawh lakluh nachang kan hre lo hi mak ang reng tak a ni.
Aizawl Chanmari veng khawtlang, kohhran leh pawl hruaitute’n thutlukna fing leh changkang zet mai an siam hi entawn entawn tlak tak a ni. Veng/khaw tam takah harsatna neuh neuh chu a awm thei ngei ang tih a rinawm a. Kohhran te deuh, hall nei lote pawh awm theih chu a ni ang a, mitthi in aţanga hall-a ruang lak a, vui zawh hnu a thlanmual panna kawng kual thui deuh pawh awm thei a ni. Chutih rual chuan India ram khawpui hla tak tak aţanga thlawhna leh lirthei hmanga ruang phur thei kan ni tawh tih hi ngaihtuah tel a ţha.
Kohhran biakin hall-a kan invui theih chuan a puithu zawk turah pawh ngai ta ila. Chubakah chuan in awmna mawng leh rem lo fahran lutuk, mitthi vui tura kalte tana ţhutna pawh awm fumfe lo leh luikawr rimchhe zet bula ţhut ngai ang chi hi, kohhran hall-a kan invui chuan kan pumpelh dawn a. Mitthi vui a kalte lirthei hunna tur ngaihtuah pawhin a remchang zawk viau dawn a ni. Dik tak chuan khawhar chhungte riahpui pawh hi kan tlin tawh meuh lova, a hun chhung kan pawt tawi chung pawhin khawhar chhungte phurrit kan ni tawh mek zawk a nih hi.
Hetiang hi kan dinhmun a nih tawh avangin kan hnam nunphung ni ţhin ţhenkhat hi chu kan nunphung inthlak leh inher danglam zelah kan insiam rem ve zel a ngai tawh a. Chu’ng zingah chuan kan invui dan, a bikin kan invuina hmun pawh hi her rem a ngai ta a ni. Covid-19 hri leng avang khan mitthi lumen leh mi an thih aţanga vui hun kan vawn ţhin kha kan chhunzawm hlei thei ta chiah lo niin a lang a. A hma thei ang ber a invui liam lam kan hawi tawh.
Chutiang a nih mek lai chuan Chanmari veng khawtlang leh kohhran hruaitute thutlukna ang hi kan zawm chhoh zel tur zinga thil ţha tak a ni. Mihring intluktlanna a thlen bakah mitthi chhungte leh vuitute tan a thawventhlak zawk ngeiin a rinawm. In lian leh ţha tak bakah kawtzawl zau tak neite leh daikil kara in tlu lek leka chengte thlenga kan inhrutrualna tur ţha tak a ni. Kan nunphung hi a inthlak chho zel lo thei lova, chhiatni ţhatni a a khawnawt a awmni kan kham hunlai, a veng/khaw micheng zawng zawngin thlawhhma kan lak hun kha a liam tawh tih kan pawm a hun tawh a ni.
Hetiang sawi takah chuan eizawnna inang pet pet kan nih hun a liam tawh avang hian kohhran lam pawh hi an inher rem a ţul ta khawp mai. Zanlam inkhawm hi kan la titawp mai thei lo a nih pawhin sumdawngte’n zan lama an dawr an hawn rei theihna atan inkhawm hun hi sawna siam rem a ngai tawh. Ţhenkhat chu zan lama hnathawk mite an ni tawh a, chubakah a nawlpui ngaihtuah pawhin rambuai lai ang mai a dawr khar hma reng tura inkhawm hun kan la kalpui hi a fuh tawh lo.
Thawhlawm lama kan duhthawh viau lai hian thawhlawm thawh tam thei tur chuan hnathawh hun chhung a rei a ngai tihte hi hriat a ţul tawh a. Mizote’n hun rei zawk hna kan thawh a, sum tam zawk kan lakluh theih dan tur hi bengsika ngaihtuah a ngai tawh a ni. Chutiang hawi zawng leh mitin awlsamna siam zawnga kan kal chuan he ram leh hnam hian a takin hma a sawn chauh ang.