Hun rei tak a bawrhsawm hnu ah rimawi khawvelin ‘Queen of Rock N’ Roll’ tia a hriatlar Tina Turner chu kum 83 mi niin a boral.
A boral thu hian rimawi khawvel a barakhaih takzet a, zaithiam lar tak tak- Elton John, Mick Jagger, Ronnie Wood, Debbie Harry, Karen O, Beyonce, Mariah Carey bakah mi tam takin thlahna hnuhnung an sawichhuak hlawm.
‘Queen of Rock ‘N’ Roll’ hi rei tak khum betin a awm tawh a, a hun tawpah erawh thlamuang takin a chawl ta niin, a thupuangtu chuan a sawi.
Tina hi Switzerland khawpui Zurich atanga hnai te Kusnacht-a a chenna In-ah a hun tawp hi a hmang a, “A rual hian rimawi khawvelin music legend leh role model a chan a ni,” tiin thuchhuahah a lang.
Kum 2016 khan ril cancer vanga enkawl niin, 2017 khan Kal thlaksak a ni bawk a, hemi hnu lamah hian ngaiawh tak tak a harsat nghal a, insawiselna neuh neuhin a tlakbuak zui a ni deuh mai.
Tina hi a pasal nen zai leh rimawi luhchilh tanin, an lar zui hle a, ‘Proud Mary’ leh ‘River Deep, Mountain High’ hla hmangin sang takah an invawrh.
Amaherawhchu, a pasal hian kut a thlak fo mai a, an inneih chhung zawng hian In chhungkhura tharum thawhna a hmachhawn tluan zak a tih theih.
Kum 1976 khan a pasal Ike hi a kalsan hmak a, amahin solo zinkawng a zawh. A hlawtlingzui hle. Grammy Award pariat a dawng tawh a, 2021 khan solo artist angin Rock ‘n’ Roll Hall of Fame-ah lakluh a ni. 1991 ah a pasal nen he dinhmun hi an lo chelhdun tawh bawk.