Sawi leh sel, khap leh endawng karah ‘The Kerala Story’ film chuan Box office-ah cheng vaibelchhe 200 chuang a lalut ta.
Shah Rukh Khan channa film hit tak, ‘Pathaan’ tih loh tunhnaia Indian film tihchhuah tawh te tan zah ngawih ngawihna tam a tling niin, media lamin an tarlang nasa.
Sudipto Sen film siam ‘The Kerala Story’ hi May 5-a tlangzarh a nih phat atang khan rampumah sawi hat hat tlingin, state thahnem takah chhuah khap zui nghal a ni a.
Sakhuanaa inlehluih tir hmeichhe thenkhatte chanchina tarlan niin, a tawpah firfiak pawl zawm tura thiam taka thlemthluk an nih dan nen lam- a taka thil thleng pholan a ni.
He film hi a tir phatah a kaltluang lo viau mai a, a zinkawng a hautak zui hle. State tam takin an huam chhunga tihchhuah an duh lova, politicks lipuiah hnuhluh tum lah bo lo, boruak a rit zui.
West Bengal sorkarin an state chhunga chhuah khap a nih thu a puan hnu ah meuh chuan Supreme Court a ngawi reng thei ta bik lova, chhuah a nih ngei theih nan disclaimer telh turin film siamtute a ngen a, chhuah a nih ngei theihnan a inrawlh ta hial.