Swedish striker Zlatan Ibrahimovic chuan kum 41 mi niin football khelh a chawlhsan thu a puang.
Pathianni zan khan Ibrahimovic hi a club AC Milan chuan an hnena a hun hman a tawp tawh dawn avangin thlahna hun San Siro mipui hmaah an siam a. Hetah hian a chawlh tur thu a sawi.
“Football hi ka mangtha tawh dawn, nangni erawh ka la mangtha dawn lo che u.” tiin San Siro a Milan tantute chu a thlah.
Ibrahimovic hian ram hrang hrang pali ah league title a chawi tawh a. Paris St-Germain, Manchester United, Juventus leh Milan khaw club pahnihte tan pawh khel tawhin club football-ah goal 511 a khung hman.
Kum 1999 khan an ram club Malmo FF tan bul tanin Ajax leh Barcelona tan te pawh a khel tawh a. Major League Soccer-ah Los Angeles Galaxy tan pawh a inkhel tawh.
“Ka thinlung a awm zawng zawng hi sawichhuak vek turin tunah thil tam tak ka rilruah a awm. Milan hi vul zel rawh se.” tiin Ibra chuan a sawi a.
Kum 2010 atanga 2012 chhung a lo khelh tawhna club-ah hian kum 2020 khan kir lehin Scudetto vawi hnih a lakpui a. “Ka lo kal hmasakin hlimna min pe a, ka lo kir lehin in thinlung min pe. Min lo lawm a, helai hi ka inpui ah min siamsak. Ka damchhungin Milanista ka ni tawh ang.” a ti.