England leh Italy atangin ngaihventu ngah mahse Arsenal striker Folarin Balogun chuan Pound maktaduai 35 in French club AS Monaco a zawm hnai.
Kum 22 mi chungchangah hian indawrna a la kal chhunzawm zel a, nimahsela season liamta a hlawhtling taka hun a hmanna France-ah hian kir leh ngei tura ngaih a ni.
United States international hian season liamta khan Ligue 1-ah Reims tan loan in a khel a, match 39 khelin goal 22 an tan a khung. Hei vang hian tun nipuiah Chelsea leh Inter Milan te pawhin lakluh tumin an lo dawr tawh.
Hetihlai hian Gunners manager Mikel Arteta chuan a first team ruahmannaah a telh lem lova, hei vang hian hralh a phal.
A striker rinrawl Gabriel Jesus a inhliam chungin Premier League matchday squad-ah vawi hnih an inkhelh tawh atangin a la telh lo.
Ani chauh hi chhuak tur a ni lova, defender Kieran Tierney chuan loan in Spanish club Real Sociedad a zawm dawn.
Kum 26 mi Scotland international hian kum 2019 khan Celtic atangin Gunners hi a zawm a, an tan vawi 120 chuang inkhel tawh mahse season liamta khan Premier League-ah match ruk chiah a inkhel a, hei vang hian inkhelh tamna tur a pan.