ZPM-in Section 9(A) Representation of the People Act 1951 bawhchhiaa puha Election Commission of India (ECI)-a an hekna chungchangah Minister of State Robert Romawia Royte chuan bân theih lohna pui kha bân theihna emaw an tih avanga hek nia a ngaih thu a sawi.
Tun hnaia a department enkawl hrang hrang hmalaknate sawi fiaha Aizawl Press Club-a thu thar thehdarhtute a kawmnaah Robert Romawia Royte chuan ZPM-in Mizoram larsap kaltlanga ECI hnena an hekna chungchangah larsap chuan a tih tur a ti tawh nia a hriat thu sawiin, “Ka ngaihsak zui lem lo a. Engmah hi ka hre zui lem lo. Thuneitute kutah a awm tawh avangin ngaihsak chiam pawh a sawt lo,” tiin The Zozam Times zawhna a chhang.
ZPM-in an heknaa lehkha pawimawh zawng zawngte pawh a en vek thu sawiin Robert Romawia Royte chuan, “MLA atanga bân theihna dan hi political party ve lem chuan an hrechiang lo hle a. Mahni’n hna kan thawh a, contract-te ka sign a nih loh chuan fapa leh nupuiten hna an thawh avangin a bân theih loh. A fapa hlawkna chu pa hlawkna a ni ve tho ang. Chu lo liama office of profit tih lam chi a ni lo,” tiin, a fapa chuan sumdawn turin dikna chanvo a neih avangin tu phal lohsak theih a nih loh thu a sawi.
India ram MP, MLA leh chief minister hrang hrangte zingah company lian tak taka director ni thei fapa an nei fur tih sawiin, “Chuvangin, in khata cheng tih vel hi MLA atanga inbânna tur khawp thu tling a awm lo. Dik lo ni ila hmalakna chu awm tawh turah ka ngai. A thang rei tawh ang reng a. A tawi zawngin, ka bân chu ka ring lo,” Robert Romawia Royte hian a ti bawk.
February 28, 2023 khan ZPM chuan Mizoram Larsap Dr Hari Babu Kambhampati hnenah Robert Romawia Royte hian The Representation of People Act 1951 bawhchhiain dik lo takin a thuneihna hmanga hlawkna a tel (office of profit)-ah puhin, Article 192 (1) to the Constitution of India thuneihna hmanga disqualify turin governor hi an ngen a ni.