Aizawl: August 21, 2023 atanga Mamit Truck Owner Association (MTOA) bultuma National Highway 44A kawngpui dan kalpui chu sorkar thuneitute nena an thil phut chungchanga an inrem hnuah Inrinni tlai khan tihtawp a ni.
Mamita lirthei hmanga eizawngte hian sorkarah thil phut hrang hrang neiin kawngpui an dangchat a. Sorkar lam thuneitute nen vawi eng emaw zat inbe mah se, an thil phut zingah Mamit district chhunga kawngpui leh Teirei lei (bailey bridge) thawmthat an ngiat avangin an inrem hlei thei lawk lo a. Mahse, Inrinni khan sorkar thuneitute leh MTOA an inbiak leh hnuah an inrem thei ta a ni.
Hun eng emaw chen an inbiak hnuah Mizoram sorkar aiawhin Vanlalmuana, Chief Engineer, Highways, PWD; V. Laldinsanga, Addl. DC, Mamit leh President, All Commercial Vehicle Mamit; President, Sub-Headquarter YMA, Mamit ten inremnaah hming an ziak a ni.
- An inremna ang chuan:
- Darlak Bailey Bridge thuam thatna tur, NH Div. I-in estimate an siam hi August, 2023 chhung ngei hian sorkarah theh luh a ni ang a. Estimate hi sanction a nih hmain PWD-in bridge part hrang hrang a lo neih sate a la khawm ang a. Phai lama chah ngaite chu estimate sanction a nih veleh a chah nghal bawk ang. Thal tui a tlema diversion road siam theih a nih hunah bailey bridge strengthening/dawh that hna thawh tan nghal a ni ang.
- NH 44A project balance work estimate siam mek hi September, 2023 thla chawhma chhung ngeia siam zawha sanction turin sorkar laipui ministry (MoRTH)-a theh luh tum a ni ang a. Ministry-in a sanction ve leh tender chhuaha a thawktu tur thlan fel tur a ni ang.
- Darlak – Tuidam concrete pavement-a motor tlan dan tur ruahmanna siam turin he mi lama thuneitute ngen a ni ang.
- Mamit – Bairabi kawng hi motor awlsam zawk a kal theihnan August, 2023 thla chhung hian a chhe zual lai repair hna thawh tan a ni ang.
- Dampui kawng lei min kumhlun lai hi motor tlan theih turin a tul anga thenfai a ni ang.