UFC featherweight fighter ropui Max Holloway chuan 145 pound huanga a vawi 20 nan hnehna a chang a. Asia fighter chhuanvawr Chan Sung Jung lakah hnehna a chang.
Singapore Indoor Stadium-ah Inrinni zan khan UFC Fight Night neih a ni a. 24-7 MMA record nei Holloway hian a khingpui hi round thumnaah second 23 chhungin a knockout.
Holloway hi mixed martial arts-ah vawi 25 a chakna a ni a, heng zinga 20 hi featherweight-ah a ni.
Hei chauh hi ni lovin featherweight-ah record a siam nual a. Vawi 26 inlanin UFC chanchin a featherweight fight nei hnem ber a ni a. Vawi 11 a tawp thlen ngai lova chak in vawi 9 knockout a a chak chu record a ni bawk.
Hetihlai hian a khingpui Chan Sung Jung chanchin in ngaihven a hlawh a. 17-8 MMA record neitu, a hmuhnawm leh tlo em avanga ‘The Korean Zombie’ tia hminglem an vuah hian MMA a chawlhsan thu a puang.
“MMA hi ka chawlhsan tawh dawn. Bul ka tan atangin champion nih ka duh a, no. 3 emaw 4 rank fighter nih reng hi ka tum lo. Holloway hmachhawn turin theihtawp chhuahin ka inbuatsaih a, ka hun a liam tawh niin ka hria.” tiin a sawi.
Holloway chuan, “Fighter ropui, hming dai leh tawh lo tur a ni. Korean Zombie a nih chhan hi a awm, zaninah a kut dinglam aiin ka kut dinglam in a fuh hmasa a, ka vannei a ni.” tiin a khingpui a fak.