Mizo boxer-te The Punch 10-ah an che tha a, boxer pathumin hnehna an chang.
Inrinni zanah Kolkata-ah The Punch 10 professional boxing series neih a ni a. Inhnek pakua zingah Mizo boxer pali inlanin pathum an chak.
Mizo chhuanvawr NT Lalbiakkima chuan Thai boxer Kitting Jareonroy a hmachhawn a. Lightflyweight fighter hian round khatna minute 2 leh secon 49-ah technical knockout in hnehna a chang.
Biakkima hian professional huangah vawi ruk inlanin vawi nga a chakna a ni a. LPS Pro Fight buatsaih turah a tel dawn tih a tichiang tawh.
Inhnek dangah super bantamweight-ah F. Zoramchhana chuan Pankaj Kumar chu round khatnaah bawk technical knockout in a hneh a. Vawi 9 inhnek tawh Zotea hi vawi ruk a chakna a ni.
Super featherweight-ah Omega Lalramdina chuan a inhnek vawi hnihnaah unanimous decision in Gugan Kumar a hneh a, a la chak ve ve.
Hmeichhe featherweight-ah MC Vankimmawii chu Gargi Chahal lakah a chak zo lo thung.