Serchhip Kawnpui VC Hall-a nimina MNF Serchhip East Block ‘Political Training’ hmanpuitu, MNF Adviser Dr R Lalthangliana chuan Pathian khawngaihna vangin MLA inthlan lo awm turah sorkarna an chelh leh a rin thu a sawi.
Dr R Lalthangliana chuan sorkar pangngai, tluang taka an sorkar hun ang kha MNF term-ah hian a awm lo va. Harsatna tinreng heng Covid, lirnghing, vawk pul hri, ramri buai, raltlan tuam hlawm ngaite an tawk a. India ram dangin an tawh loh an buaipui hnem hle a. Pathian leh kohhran, mipui leh sorkar tan hona vangin tun hi an la thleng tawk tawk a. Hetiang ang harsatna tam tawk hi sorkar term khatah a la thleng ngai lo niin a sawi.
MNF Adviser hian MNF sorkar chu engmah ti mang lo anga an sawi chu an hriat chian loh vang tih sawiin, “Serchhip chauh hi sawi ila. Serchhip College Administrative building te pawh sak mek a ni a. Serchhip Hospital sak tharna tur lungphum pawh kan phum thuai dawn a, damdawi in lian tha tak in nei tur hi ka lawmpui che u,” a ti.
Manipur, Myanmar leh Bangladesh buaina avanga Zohnahthlak unau harsatna tawkte thlavang hauha dinpui tur hi chuan Chief Minister Zoramthanga aia tling leh tlak an awm lo tih sawiin, “Kan unaute tan kan ding zel dawn a ni. Harsatna an tawh laia sorkar tura min dahtu chung lam khian hun tha min pe leh ngei ang tih ka ring tlat a ni,” a ti bawk.