Aizawl : Khawzawl Chief medical officer (CMO) office building thar chu nimin khan Deputy chief minister Tawnluia’n hawngin, September thla chhungin SEDP 2nd phase sem hman tum a nih thu a sawi.
Hawnna puala inkhawm Khawzawl Electric Veng YMA Hall-a neihah Tawnluia chuan, District hospital puitling tak tak ni tura Khawzawl damdawi in-in ke a pen chho mek chu a lawmawm hle a ni tiin, CMO building tha tak neih theih nan a hmalatu Health Minister Dr. R. Lalthangliana leh a thawhpuite chungah lawmthu a sawi.
Deputy chief minister chuan Mizoram sorkarin mipuite hmasawnna ngaipawimawh mah se, hripui leng vangin harsatna tam tak an tawk a, sorkar laipui atanga sum hmuh tur Rs vaibelchhe 3000 dawn a hmuh loh a nih thu sawiin, “Mipui ten anmahni kutkawih ngeia intodelhna kawng an zawh theihna tur sorkar flagship program – SEDP pawh hripui lengin tikhaihlak mah se, 1st phase-ah mi 60,000 kan tuam tawh a, 2nd phase-ah mi 60,000 bawk tuama September thla chhung hian sem chhuah hman tum a ni,” a ti.
Health & Family Welfare Department Principal Director Dr. Vanlalsawma kaihhruai inkhawmah hian Khawzawl Addl DC Lalfakzuala pawhin thu a sawi.
Khawzawl CMO building hi Rs nuai 418 seng a, Lushai Engineers ten an sak a ni a; Mizopa chhiara chhawng li-a sang a sak a ni.