Nimin khan Tuirial bial chhung atana SEDP chhungkaw lam hawi thawh hnihna bul tanna neih a ni a, Tuirial bialtu MLA K Laldawngliana’n a hmanpui.
K Laldawngliana chuan SEDP thawh khatna hnuaia tanpuina dawngte chuan 2nd Instalment Rs. 50,000 an dawng tawh a, tunah a thawh hnihna atana 1st Instalment sem bul tan leh a nih thu a sawi a, “Kar thar lamah chuan beneficiary-te bank account-ah department-ten an thun tan thei tawh ang,” a ti a; MNF a sorkar zela harsatna dangin a tlakbuak lo a nih chuan an sem chhunzawm zel dawn tih a sawi.
He hun hi Kolasib District Veteinary Officer Lalsanglien Ralsan kaihhruaiin Kawnpui, Hortoki, Thingdawl, Bualpui, Zanlawn, Khamrang leh Mualkhang atangin Vety department hnuaia SEDP tanpuina dawng turte an kalkhawm a; pawisa an dawn theih nana beneficiary-te bank account leh document-te enfiahsak niin, an hriat tur inhrilhfiahna hun hman a ni.
Family Oriented SEDP 2nd Phase hnuaiah hian Vety Department hnuaia trade thlangtu, Kolasib district chhunga Tuirial bialah beneficiary 1,000 awmin, Kolasib-ah 946 leh Serlui-ah 414 te an awm a ni.