Manipur-a Zohnahthlak hnam peng hrang hrangte inpumkhatna turin tun dinhmun atan ‘Zo United’ din a ni a, September 20, 2023 hmain hruaitu an inruat fel ang.
Mizorama tlawmngai pawl lian hrang hrang intelkhawm, NGO Coordination Committee kaihhruaina hnuaia Manipur-a Zohnahthlak pawl hrang hrang hruaitute chu Nilaini leh Ningani khan Central YMA Hall-ah an inhmu khawm a, a ni khatnaah an inpumkhatna chungchang an sawi ho bakah an inkhaikhawmna tura pawl hming rawtnate a awm a, Ningani khan thukhawm lehin pawl pakhata an inkhaikhawmna turin tun dinhmun ‘Zo United’ din an rem ti a ni.
Zo United hruaitu tur hi September 20, 2023 hmaa inruat fel theih nise an tih bakah hruaitu inruatnaah hian hnam hrang hrang leh tribe aiawh pakhat theuhte, ITLF, COTU leh HTC aiawh mi pakhat theuh telin hruaitu inruatna hun hi hman nise an ti.
Inhmuhkhawmnaah hian Manipur-a Zohnahthlak pawl hrang hrang inthlunzawmna tura pawl lo ding tawh, eng emaw avanga ding mumal ta lo pahnih – Coordination Committee on Separate Administration Manipur (CORSAM) leh Joint Inpi Council (JIC) te chu thiah nise tih a ni bawk.
Hemi chungchanga NGO Coordination Committee-in thuchhuah a siamah chuan inpumkhatna tura pawl din, ‘Zo United’ pawl hming chu hnam bil hming chawia phuah ni lovin Zohnahthlakte inpumkhatna tur leh an thawhhona tur chauha hming phuah a nih thu an tar lang a ni.
Thukhawmnaah hian Manipur-a Zohnahthlak pawl hrang hrang aiawh 16 leh MLA paruk an tel bawk a ni.