Aizawl: Manipura Zofa pawl hrang hrang khaikhawm tura din, Zo United hruaitute chu nimin khan Central YMA Office-ah lengin an hmalak dan hrang hrangte Central YMA hruaitute an sawipui.
An inkawmnaah hian Zo United hruaitute chuan Manipur tual chhung buaina avanga Zofaten harsatna an tawh chungchangah Zo United-in hma an lak chhoh mek dante an tar lang a, Zofa pawl hrang hrangte lungrual taka an kal thu leh inpumkhat zelna tura theihtawp an chhuah thu an sawi.
Central YMA President R. Lalngheta chuan Zo United hmalak chhoh dan leh Manipur-a Zofa unaute zingah inpumkhatna a awm zel avanga lawmawm a tih thu a sawi a. Central YMA chuan tanpui an ngaihna apiangah theihtawp an chhuah zel tur thu a sawi.
He hunah hian Central YMA-in Manipur tual chhung buainaa Zo United hmalakna atan Rs. 20,00,000 an hlan a. Albert Renthlei, Convener, Zo United-in a dawng a ni.