Police-ten Hizbul Mujahideen firfiak pawla tel, an mi man duh tak, hel pawla tel tura thalaite sawm thin nia hriat chu nimin khan Kishtwar district, Jammu & Kashmir-ah an man tih police officer pakhatin a sawi.
An mi man hi Reyaz Ahmad a ni a, Sounder Dachhan khuaa cheng a ni a. Firfiak hlauhawm tak, ‘Jhangir’ tia an koh mai thin, Mohammad Amin nen pawha inhnimhnai tak niin an sawi a. Police hian an thu dawn bawhzuiin an khuaah hian an luhchilh a, an man ta niin Senior Superintendent of Police, Kishtwar, Rajinder Gupta chuan a sawi.
Tun hnaiah social media-ah Ahmad hi AK assault rifle a keng lai thlalak thehdarh a ni a, he thlalak hi July 1-a an khua atang thova a thawhpui mi 2 man atanga hmuh a ni a. A thiante pahnih man an nih hnuah hian an thubuai pawh Kishtwar police station-ah ziah luh nghal a ni.
Officer chuan Ahmad hi Srinagar-a Parimpora venga hel anga chetna thilah pawh man duh a nih thu a sawi a. A hnen atang hian thil tam tak an hriat theih an inbeisei a, thalaite hnena firfiaka che tura a sawm dan leh a sawm tawhte pawh an beisei.
A kawppui pakhat, Jehangir hi Kishtwar leh a chhevela firfiak pawl dam rei ber pakhat a ni bawk.