Gaza atanga Palestinian Hamas helhovin Israel an luhchilh thutnaah Thai 12 an that a, 11 an hruai bo bawk.
Inrinni atanga tharum thawhna thlengah hian Thai pariat an inhliam bawk niin Thailand foreign ministry chuan a sawi.
An air force thlawhnate chu an khua leh tuite phurh hawna turin an inring reng tih a sawi bawk.
Israel-ah hian Thai 30,000 vel lovah an thawk a, a tam ber hi Gaza ramri bulah an ni a. Nepal pawhin an mi leh sa 10 thah an ni tih a puang bawk.
Israel-a ram dang, an khua leh tuite thah, ruk bo leh an chin hriat lohva awm mek sawi zingah US, UK leh Germany pawh an tel.
Thailand-a Labour Minister Phiphat Ratchakitprakarn chuan indona nasatna hmunah Thai hnathawk mi 5,000 vel an awm mek niin AFP news agency hnenah a sawi a; mahse, Israeli sipaiten hmun himah an thiar sawn mek tih a sawi bawk. Mi 1,099 chu haw tur zingah an inziak lut tawh tih a sawi.
Gaza Strip bula Mivtahim khuaa lova thawkte chuan Hamas helho hian Inrinni hma takah khan rocket-a an kah hnuah an farm an luhchilh zui niin an sawi.
“Hamas helho hian rocket an kap hmasa phawt a, farm-ah hian an lo lut zui a. Ka tlan a, ka mut pindanah ka biru nghal a ni,” tiin Udomporn Champahom chuan BBC a hrilh.
Udomporn-a hian a hnuah Israeli sipaiten an chhanchhuah thu a sawi a. A bul hnaia awm Thai pakhat chu a ke-ah kah fuh a ni a; mahse, a ziaawm tawh nia sawiin an kahna chu ‘bottle chhin ang vela lianin a kua’ niin a sawi.
Thai mi dang pakhat chuan, “Ka tlan a, truck hnuaiah ka bawkvak lut a, Hamas-ten min rawn pawt chhuak a, silaiin min tin a, leiah an kap,” tiin a sawi a. A hnuah himin a tlanchhuak thei hlauh niin a insawi.
Wanida Maarsa-i chuan a pasal, kum hnih dawn avocado chinna hmuna thawk tawh, Anucha Angkaew-a chu helhovin an hren mek zingah a tel tih BBC Thai hnenah a sawi.
Kartawpa Hamas-ten video an thehdarhah a hmu tih a sawi a. “Ka video-a lang kha amah ngei a ni,” a ti.
“Bangkok-a zing dar 2:00 (India-a Inrinni zing dar 12:30) atang khan ka bepawp thei tawh lo va. A hma lawka kan fanu a muthilh hmain kan inbia a ni,” tiin Wanida-i chuan a sawi.
Ram 50 chuang zetin Israel-ah hian an khua leh tui hnathawka awm an awm mek tih an sawi tawh.
Nepal chuan Pathianni khan zirlai 10, Israel-ah hna thawk tur leh lo neih lama thiamna pur tura kalte chu thah an ni tih a puang.
Hengho bakah hian Nepali 265 lai Israeli farm hrang hrangah an thawk mek a, 4,500 lai mi awmpuiin an awm bawk tih an sawi.
Israeli police chuan Nepali embassy hnenah Nepali mi chin hriat loh pakhat awmin pali dangin hliam an tuar a, pakhat chu a tha vak lo tih an hrilh bawk.
India chuan Israel atanga a khua leh tuite hruai haw turin ‘a bei mek reng’ tih a sawi a. Chanchinbute chuan Indian 18,000 vel hna thawk leh cheng an awm niin an tar lang hlawm.