Kum 2023 Madhya Pradesh assembly inthlan chu thawh khatin November 17 hian neih a ni ang a, Rajasthan-in November 23-ah zuiin Telangana-in November 30-ah an zui leh bawk ang.
State panga inthlan hi November 7-ah Mizoramah bul tan a ni ang.
Tun tum inthlanah hian Chhattisgarh chiah thawh hniha inthlang tur niin a hmasa zawk hi Mizoram rualin a ni ang a, a hnuhnung zawk erawh Madhya Pradesh rualin a ni thung ang.
Inthlana vote tlate hi rualin December 3-ah vek chhiar a ni ang.
Tun tuma state panga inthlanah hian mi vaibelchhe 16.1 velin vote an thlak tura ngaih a ni a, mi tam tak chuan kum 2024 Lok Sabha inthlan hma lawka neih tur a nih avangin ram pum inthlan tur atan hian ‘semi-finals’ ang hialin an sawi a ni.
Inthlan hnuhnung ber, kum 2018-ah khan Congress chuan Chhattisgarh, Rajasthan leh Madhya Pradesh-ah hnehna an chang a. Mahse, Madhya Pradesh-ah hian an hruaitu lawk, Jyotiraditya Scindia chuan chhuahsanin amah zuitu MLA 24 dawnin an zui chhuak a, BJP an zawm a, Kamal Nath-a sorkar a tluk phah.
Chhattisgarh-ah hian Congress chuan bial 68 zet lain BJP-in 15 chiah an la a, Congress hian vote tla zinga 43% zet an chang nghe nghe a. Assembly-ah thutna 90 neiin hnehna chang turin mi 46 neih tlin a ngai a ni.
Madhya Pradesh-ah hian BJP leh Congress an inhnehtawk hle a, saffron party hian bial 109 lain Congress-in 114 an la a. Assembly-ah thutna 230 awmin rorel turin thlawptu 116 neih a ngai a ni.
Party pahnihin vote an hmuh zat pawh a inang tawk hle a, vote tla zinga 41% ve ve an chang a ni.
Rajasthan assembly-ah thutna 200 awmin rorel turin 101 neih a ngai a, Congress chuan bial 100 lain BJP-in 73 an la ve thung a. Congress MLA paruk nei Bahujan Samaj Party nen sorkar siamin Ashok Gehlot chu chief minister a ni.
Tun inthlana chhim lam state awm chhun, Telangana-ah hian bial 119 awmin hnehna chang turin bial 60 lak a ngai a. Chief Minister K Chandrashekhar Rao-a kaihhruai, Bharat Rashtra Samithi chuan kum 2018 inthlanah khan bial 88 zet an la a. Congress-in 19 lain Asaduddin Owaisi-a kaihhruai AIMIM chu pathumna niin bial sarih an la bawk a. BJP chuan bial khat chiah changin Goshamahal bial chu T Raja Singh-a’n a chang.
Mizoram-ah chuan Mizo National Front (MNF) chuan kum 2018 inthlan khan bial 40 awmah bial 27 an la a. Congress-in bial li chiah changin BJP-in bial khat an chang ve bawk a. A dang zawng hi independent-a chuhtuten an la.
Mizoram assembly-ah hian sorkarna siam turin bial 21 lak a ngai a ni.
Chhattisgarh, Madhya Pradesh, Rajasthan leh Telangana assembly kal mekte hun hi January-ah a tawp dawn a, Mizoram hi December-ah a tawp ve thung ang.