English club Aston Villa in UEFA Europa Conference League knockout stage luh an hnaih tawh a, Dutch club AZ Alkmaar lakah 2-1 a chakin tling turin point khat chiah an mamawh tawh.
Villa Park a Ningani zana inkhelah Aston Villa hian an mikhualte lakah si an phur hmasa a. Second half tan tir lamah Vangelis Pavlidis chuan goal a khung.
AZ in hma erawh an hruai rei lova, minute 9 hnuah Diego Carlos chuan an si phurh a sut a, Leon Bailey corner pet chu a tauh lut.
Minute 81-naah Villa tan forward che tha tak Ollie Watkins chuan Douglas Luiz ball pek fing tak chu an chakna goal ni turin a khung.
Villa hian khelh hnih an la hmabak a, tling chiang turin point khat bak an mamawh tawh lova. Kum 1996 hnua a vawikhatna atan trophy lian chawi tumin ke an pen mek.
Aston Villa manager Unai Emery chuan, “Goal kan chhuah hnua kan inpekna a fakawm a, kan rilru puthmang a dik.”
“Europe ah team tha laka hnehna kan chan zel theihna turin zanina kan inkhel ang atang hian kan inzir a ngai.” tiin inkhel zawhah a sawi.
Inkhel dangah Fiorentina in 1-0 in Cukaricki Belgrade an hneh a. Gradski stadion Dubocica a inkhelah M’Bala Nzola chuan penalty atangin goal a khung a. An group atangin tling thei pathum an la awm.
German club Eintracht Frankfurt erawh an tling chiang tawh a, Farès Chaïbi goal khung hmangin 1-0 in HJK Helsinki lakah hnehna an chang.