Carlos Alcaraz chuan mipa tennis season kharna inelna ATP Finals-ah semi-final luh inbeiseina siam turin hnehna a chang a. Hetihlai hian Daniil Medvedev chuan semi-final a lut chiang tawh.
Wimbledon champion Alcaraz hian Ningani zingkar khan Turin khawpuia inkhelah hian Andrey Rublev chu 7-5 6-2 in a hneh a. A khingpui hian Alcaraz beih let tuma theihtawp a chhuahna lamah tang ulhin amah leh amah racquet in a invua a, thisen a chhuak hial.
Nikum lama inhliam avanga Finals khel tawh lo Alcaraz hi Red Group a inkhel a hmachhawn hmasak berah Alexander Zverev lakah a tlawm ah. Mahse hnehna a chan leh zui avangin beisei tur a la nei.
Kum 2020 champion Medvedev hi a hneh leh chuan a tling chiang tawh ang.
“Thawhtanni a ka inkhel nen chuan danglam tak ka ni a, tun tumah tennis level sang tak ka khel thei. He tournament nuam takah hian champion thei tura ka inlan dawn a nih chuan khatiang anga khelh tam zawk kha ka mamawh.” tiin Alcaraz chuan a chak hnuah a sawi.
Rublev laka match hmasa zawka chak tawh Medvedev hian seeded number three changtu Zverev 7-6 (9-7) 6-4 in a hneh ve thung.
German star kumtawp khar tha tak Zverev hian set khatna tie-break ah 4-1 in hma hruai hman mahse a tawp a khar thei lova, hemi hnuah hian Medvedev insiamtha chu a veng zo tawh lo.