Zote Toyota Mizoram Premier League Season 10 chu Mizoram inthlanpui leh Santosh Trophy avanga chawlh lailawk a nih hnuah khelh chhunzawm a ni a. Ningani ah Chhinga Veng in hnehna changin an chhunzawm.
Ist Bn MAP Ground, Armed Veng a inkhelah hian Chhinga Veng in Kolasib team Project Veng FC an hmachhawn a. 2-1 in hnehna an chang.
Chhinga Veng hi phase 1-ah beisei anga che tha tawk lo an ni a. Season tirah che tha tura ngaih nimahsela point hloh an ngah.
Mahse season chawhnu lamah an team an inchhawrkim thei tawh dawn niin a lang a. Hei hi an inkhelah pawh a hriat.
PC Lallawmkima leh Lallawmsanga ten halftime hma leh hnuah goal an khung a. An goal khung kar lakah hian Project Veng FC tan Jehova Lalthangsanga chuan goal khat second half-ah a khung ve bawk.
Inkhel hmasa zawkah Electric Veng FC leh table mawng a awm FC Venghnuai te an inkhel a, goal inpe lovin team pahnihte an inhnehtawk a, point khat ve ve an insem.