Aizawl: KVK Khawzawla thawktute chuan nimin khan Rabung khuaa tomato chingtu chhungkua 30-te nen Phunchawng, Kangfim leh Khumzawl zauah Field Day an hmang.
He hunah hian Dr. Malsawmkimi, Senior Scientist & Head, Rambuatsaiha, Subject Matter Specialist (Agronomy) leh R. Vanlalduati, Subject Matter Specialist (Soil Science) te chuan tomato chingtute tana pawimawh hrang hrang zirtirna an pe.
Rabung khuaah hian kum 2021 atangin tomato an ching tan tawh a. KVK-a thawktute hian zirtirna pe thinin tomato chi – Arka Abhed leh Arka Samrat hi KVK Khawzawlten IIHR-NEH scheme atanga an pek a ni a. Rabung hian tomato hi an seng mek a, quintal 500 seng tawhin tunah hian seng mek zel a ni.
KVK hian kum 2015 khan Tuipui khuaah fur laia tomato chin hi bul an lo tan tawh a. Khawzawl district chhunga khaw hrang hrang Tualte, Chawngtlai, Neihdawn leh Khawhai-ah te tomato hi an ching chho tan a, KVK hian tomato chin kawnga harsatna an tawh leh mamawh ang zelin zirtirna an pe thin a ni.