Aizawl: Mipui tangrual pawl tia sawiten Tuibual khuaa an camp an lak avanga tlanchhia Myanmar sipai 29-te chu nimin khan Mizoram Police kutah an inpe.
Tangrual pawlte chuan beihpui an thlak meknaah nimin zing khan Tuibual khuaa Myanmar sipai camp an la leh a, he camp-a duty Myanmar sipaite chu Mizoram lama tlanchhiain nimin chawhnu dar 2:18 vel khan Vaiphai kai, Tiau kamah an lut a, Vaphai VC leh YMA hruaitute leh Dungtlang Police ten an lo dawngsawng a, Assam Rifles kutah an hlan nghal a, Myanmar sipaite ralthuam ken silai leh a mu bakah, bomb leh grenate thahnem tak chu an mansak a ni.
Tar lan tawh thin angin Myanmar sipai sorkar paih tumtu mipui tangrual pawl sipaiten beihpui thlakin November 12 zan atang khan Mizoram dep, Khawmawi leh a chhehvelah Myanmar sipaite nen nasa takin an kap a, a chak lo zawkah sipaite chu tang zelin Thawhtanni khan Myanmar sipai 43 chu Mizoramah lutin police kutah an inpe a, Thawhlehni khan an ramah thawn let a ni a, Nilainia inkahnaa chak lo zawk, Myanmar sipai 29-te chu Mizoramah tlanchhiain an inpe leh ta a ni.