Aizawl: I&PR department leh Mizoram Journalists’ Association (MJA) huaihawtin nimin khan National Press Day 2023 chu Mizoramah pawh hmun hrang hrangah pawh hman a ni.
Aizawlah chuan I&PR Auditorium, Treasury Square-ah hman niin, I&PR Director C Lalnunkima kaihhruai inkhawmah hian V Ruatsanga, Addl Secretary, I&PR leh MJA President C Lalrambuatsaiha ten thu sawiin, thu thar thehdarhtute tana hriat tur leh zawm tur pawimawh hrang hrangte an sawi bakah, thawhhona leh inpumkhatna tha awm zel se an duh thu an sawi a. Hnam leh hnam innghirnghona awm lova thlei bik nei lo leh thudik bengvarthlak chauh chhuah thin turin kalkhawmte an chah.
Democracy ramah media-te chu fourth estate/pillar an nih ang ngeiin kumin election nei zawh takah pawh mipuite hriat tur zirtirna leh puan chhuah kawngah thu thar thehdarhtute chu an thawhhlawk hle tih sawiin V. Ruatsanga chuan MJA-te chungah lawmthu a sawi nghal bawk.
He hunah hian Esther Lalremruati, Scientist, MIRSAC chuan kumin National Press Day thupui, ‘Media in an Era of Artificial Intelligence’ tih hmangin zirtirna a pe a. Sawihona leh zawhna leh chhanna neih chhunzawm a ni bawk.
National Press Day puala inkhawm buatsaihah hian P.B Lianthangpuii, Jt. Director, I&PR chuan lawmthu sawiin, K. Lalhmuakliana, Dy. Secretary, I&PR chuan he hun hi a hmanpui bawk.
National Press Day hi kum 1966-a Press Council of India din cham atanga hman tan niin press mite zalenna, hamthatna, mawhphurhna leh hmasawn nana hman thin a ni.