Aizawl: Ni hnih awh tur, Mizoram Fish Festival 2023 chu nimin khan Aijal Club Park-ah tan a ni a, vawiinah chhunzawm a ni ang.
Mizoram Fish Festival hawngtu, Khuallian Fisheries department secretary C Lalzahngoa chuan Fish Festival chu National Fisheries Development Board (NFDB)-in PMMSY sum hmanga an huaihawt a nih thu sawiin, tual chhung dil sangha khawitute leh sangha kaihhnawih thila sumdawngte inphochhuahna hun tha buatsaih a ni chu lawmawm a tih thu a sawi.
C Lalzahngoa chuan, Mizoram luia sanghate chu humhalh a tul thu te, sangha fuan hunlai a nih avangin October 10 atanga December 18 thleng chu sangha man phal loh hun a nih thu leh mipuite chu luia sanghate man rih lo turin an ngen tih a sawi.
Fisheries department-a Joint Director Laltleipuii pawhin thu sawiin Mizoramah sangha dil hectare 5,000 chuang lai a awm thu te, fisheries department-in sangha khawitute tan theihtawp chhuaha hma an lak mek thute a sawi a, sangha dil atanga sangha thar chhuah tihpun mai bakah luidung sangha thar chhuah tih pun pawh a tul hle tih sawiin, an department leh YMA-in lui dung humhalh hna an thawh awmzia a n eih chhoh zel an beisei tih a sawi bawk.
Mizoram Fish Festival-ah hian stall 10 awmin Mizo thar chhuah sangha thar lam leh bawma khawi chi sanghate chu mipui lei theih turin pho chhuah a ni a, vawiinah festival hi neih chhunzawm leh a ni ang.