- Dr. C. Lalrampana
A KAMKÊUNA
Mizoram State Assembly inthlanpui rah (result) seng theih hun thlen hmain ni tam kan nei ta lo. Kan dam tlang a nih phawt chuan kår lovah a rah chu kan seng thuai mai dawn e. Political party 5 leh independent 27-te chuan buh that duhna leilung tha tak takah buh chi an theh theuh emaw an intih laiin an buh chi theh chu a then kawngdungah te, a then hnimhlingnei zingah te, a then pialtlep leipan hmunah te, a then lei thaahte a tla a, a tlãkna leilung a inang lo zung mai! An lo to sang a, an than dan leh rah chhuah dan pawh a inang lo hlawm hle. A then chu hlawk takin an rah a, a then an nget a, a then seng tlãk lohvin an vuai a, a then a si an ni a, an rin ang hehu chuan an seng hlãwk dawn lem lo a nih hmel hle.
INBUMNA NI CHU?
Mizote hi langtlang taka thu sawi chiang ngam lo, pehhel theih dan dan zawnga thil sawi ching, thu khuh ching, mahni nihna baka insawi ching kan ni tlangpui niin a lang. Nov. 7, 2023 vote thlåk ni pawh khan mahni party vawn laia rinawm lo, a ruka party danga Uire mi engemaw zat an awm rualin party bik ngaihtuah lem lo, pocket money pe tam theitu apiang vote mai thinte an awm nual bawk a. A then chu an chhung hnaivai leh hmelhriat tha candidate zingah an awm avanga mahni party vãwn lai phatsana midang vote ta daih pawh tam tak an awm niin a hriat theih. Voters-te titi leh kamchhuak ka hriat ruk thenkhatah chuan “chumi khami party-te chuan anmahni vote tur ka ni emaw tiin taxi/motor-in min rawn lam a, mahse, anmahni ka vote tawp si lova;” tih te, “chumi khami chuan sumo chuan man leh pocket money min pe a, mahse, mi dang ka vote daih si a.” etc. tih thãwmte ka tawng nual mai. Sapho leh hnampui, hnam fing zawkte chuan zep nei miah lovin tlang (Frank) takin an nihna leh an duh zawng vote tur an sawi lang hmiah hmiah ngam thin a, an fakawm hle. Keini erawh kan mizia a danglam hle a. Mahni vote tur ngei hre chiangsate pawhin an zep tang tang zel thin a ni. Chuvangin, political party hrang hrang candidate-te leh independent candidate-te hian vote hmu tura an inbeisei zat an hmu hlawm lo mai thei. Minister chelh mek pakhat leh ruling party MLA ni lai mek dinna biala mipui sukthlek dan chiang taka lang thei pakhatah chuan mipui voters tam tak an party mi leh sa ni reng siin anmahni party candidate an vote loh thu Frank taka sawi hmiah hmiah ngam an awm nual nia hriat a ni bawk. Politician-hote hian mipui min bum zing tawh em a,, mipuiin an bum ve hun a thleng ta em ni? Chuvangin, vote thlak ni kha chu inbum runpui ni ni berin a lang. Kan ringtu nun dan tur nena khaikhin chuan kan awmdan hi thil mawi tak chu a ni lem lo hle.
CM THAR TUR CHU?
Inthlan campaign tirh atanga a vãwrtawp thlengin, chumai ni lovin kum 2019 atanga 2023 inthlanpui thlir lawka sorkarna siam thei ngei tura inbeisei theuh chungin political party hrang hrangte’n thahnemngai takin tan an la theuh a, independent candidate hrang hrangte pawh sorkarna siam turin an inbeisei ve tho bawk. An kalna apiangah, Political campaign-na hmun hrang hrangah, social media chihrang hrang visual, print or non-print thleng pawhin political party leader tinte’n an sorkar huna an tihdan tur an sawi chãmchi a; vote thlak zawh hnu thleng pawhin a ri thangkhawk chuan bengdar a nghawr chhe lo chauh ni berin a lang. Inthlan result kimchang puan a nih hma hi chuan tunge sorkarna siam ang tia inrinsiak mai bak chu Pa vana mi chauh lo chuan tuman engmah kan hre lova, beiseina thuhmun neih hun lai leh inhisap nawm hun lai tak a ni. Chuvangin, tunge CM thar tur chu ni ta ang tih chu mitin thinlungah a inzawt su dup dup reng mai chu a nih hi! Mahse, ni rei lote hnuah CM thar chu a lo lang mai dawn a ni. Tunah zawng dãrthlalangah kan hmu riai ruai a ni, chutih hunah erawh chuan CM thar nen inhmatawnin a ni tawh ang.
A TLÃNGKAWMNA
Sorkar thar siam tum theuh, political party 5 leh independent 27 zet an awm a; a thenin “kan sorkar chuan development hrang hrang kan tihlawhtling ang” an ti. A thenin “Kristian sakhua kan humhim ang a, old pension scheme kan hmangleh ang; tar pension hlawh tha zawk kan siam ang” an ti; a thenin “mipui sorkar leh bana kaih policy kan kalpui ang a, kan eiru ve lovang tih kan tiam vek tawh a, min enchhin ve mah rawh u” an ti; a thenin “Pathian leh kan ram tan, a hma aia chak zawkin ram kan kaihruai ang, SEDP pawh kan chhunzawm zel ang” an ti; a thenin “Zoram thar sorkar kan din ang” an ti; a thenin “Mizo hnam humhimna zo-nation vaiho thuhnuai atanga chhuakin independent nation kan din ang” an ti. A thenin “Myanmar nena insumdawn tawna zauzawk leh changtlung zawk, kawngpui tha zawk, rel kawng awm thei zawng zawng kan siam ang” an ti. An tum dan theuh thlir khian tuate pawh khi CM thar ni dawn ta se kan Zoram hi khawizu leh hnute tuia luangram, vanram tlafual lei eden mi ramin a tluk rual loh kan ni thei ngei dawn niin a lang. A va nghahlelhawm tehlul em!
Mahse, Ministry thar lo ding tura CM thar tur hian political campaign vang laia Zoram mipui hmaa an tiam biahthu di an chham zuah zuah leh an ãupui dum dumte kha a takin an tileh ngut ang em le? Chuvangin, CM thar tur, Zoram mipuite’n thinlung leh tihtakzetin kan lo lawm lawk (welcome) che a, mahse, i lalthuthleng i hun hunah khatiang taka Zoram mipui hmaa i thil tih tur i ãu chhuahpui kha theihnghilha i hlenchhuahleh silo a nih chuan e, engtik khawtikah mah kan ringleh tawh ngai lovang chea, kan Zoram atang hian kan hnawt chhuak hial lovang che tih pawh sawi theih a ni lo tih i lo hre lãwk dawn nia tiin Zoram thatna tur ka duh luat vangin ka tawnmangah ka lo vau lãwk che a ni tih i lo hre dawn nia.