Match 14 chhung tlawm lova kaltluang lai Argentina chu Uruguay kutah an tlawm a. 2-0 in 2026 World Cup Qualifying inkhelah Uruguay in hnehna an chang.
Zirtawpni zinga Buenos Aires a La Bombonera a inkhelah hian Uruguay in Ronald Araujo hmanga halftime dawna goal an khung hnuah second half tawp dawn lamah Darwin Nunez chuan an goal hnihna a khung.
World champion ni lai Argentina hi nikum World Cup a Saudi Arabia laka an tlawm hnuah tun hi an tlawm leh hmasak ber a ni.
Argentina captain Lionel Messi chuan, “Kan hahdam hman lo hrim hrim. Kan result hi kan tan fiahna tha a ni. Team inpe tak, chak tumruh tak an ni a, kan duh anga inkhelh an ti harsa hle.” tiin a sawi a.
“Uruguay inkhelah khan Marcelo Bielsa team an ni tih a hriat nghal. Player tha a nei bawk a, team tha tak an ni.” a ti.
Inkhel dangah Colombia tan tunlaia chanchin ngah Luis Diaz chuan goal hnih a khung a, 2-1 in Brazila an hneh.
Barranquila a inkhelah hian Brazil in minute 4-naah Gabriel Martinelli hmangin goal khung nghal mahse tunhnaia a pa an rukbo avanga ngaihven hlawh Diaz-a’n minute 75-na leh 79-naah te Colombia tan goal a khung a. A hi chhuah zalen tawh niin inkhel entu zingah a tel.