Aizawl : District Institute of Education & Training (DIET) Aiz- awl-in kar kalta Zirtawpni khan an auditorium-ah Platinum Jubilee an lawm a, School Education Secretary Dr Lalzirmawia Chhangte-in a hmanpui.
Dr Lalzirmawia ch- uan DIET Aizawl-in kum 70 a lo tling ta chu a lawmpui thu sawiin, “Kan education system hi kan ram darthlalang a nih avangin zirtirtute hian mawhphurhna sang tak an nei a, hna dang hmuh loh avanga zirtirtu hna thawk ve ringawt, hlawh lakna tur chauha a run dala thawk satliah an awm a nih chuan chung zirtirtute chu kan ram leh hnam hmelma dik tak an ni” a ti.
Zirtirtute chu an training hun laia an zir te an thawhna sikul țheuhah a taka hmang chhunzawm turin Education Secretary Dr Lalzirmawia chuan a chah a. Thingtlang sikula thawkte pawhin teaching aids/resources te duhthusam a awm remchang lo a nih pawhin resource awm ang ang te hmang țangkai thiam thei tura an inbuatsaih a pawimawh thu a sawi.
DIET a thawk zirtirtute chu Mizoram hma lam awm dan hriltu an ni thei tih hrilhin, “Kan education system-ah hian thui tak mawh in phur a. Zirtirtute zirtir lehchhawngtu in nih avangin in dinhmun hi a pawimawh hle a ni” Education Secretary chuan a ti bawk.
Education Secretary chuan quality education tak tak nei thei tura pawimawh hmasaber chu zirtirtu, a hna zawng zawnga inpe a nih thu a sawi a. Chutiang zirtirtu chher chhuaktu ni thei tura tan la sauh sauh turin DIET a thawk te chu a chah .
DIET Platinum Jubilee lawmnaah hian School Education Director Lalsangliana pa- whin DIET pawimawh na sawiin “Mihring lo piang chhuak hmantlaka chherchhuaktu zirtirtu chhertu a nihna hi a hlu hle a ni” a ti a. “Zirna hian mihring nun laipui pawimawh tak a luah a, chuta a laimu chu DIET hi a ni” a ti.
SCERT Director Zohmingliani pawhin thusawiin, DIET hmasawn dan fakawm a tih thu a sawi a. “Primary zirtirtu training-na atana din kha B.Ed zirna petu a ni thei ta hial a, a lawmawm hle a ni” a ti.
Sorkar thuchhuahin a tarlan danin DIET Aizawl-ah hian zirlai D.El.Ed – 237, B.Ed -99 an vaiin 336 leh thawktu teaching faculty -38 leh Non-teaching – 19, an vaiin 57 an awm mek a ni.