Aizawl: MNF party chuan nimin khan an pisa, Mizo Hnam Run-ah chhung inkhawm an nei a. He huna thu sawitu MNF Adviser Dr R Lalthangliana chuan an party chu Lalpa’n sorkarna a pek leh tur thu a sawi.
MNF chu ‘Pathian leh kan ram tan’ titu an nih angin an dah hmasak ber tur chu Pathian a nih thu sawiin Dr R Lalthangliana chuan, “Pathian hre chunga hmangaihna, lainatna leh duhsakna nen kan kal a nih chuan Lalpan sorkarna min pe leh em em ang,” a ti.
Dr R Lalthangliana chuan Pathian hruainaa harsatna lian tham awm lova inthlan zawh a ni ta chu lawmawm a tih thu a sawi a. “Politics-a kum 30 bawr ka lo awm ve tawh a, tun tum MLA-te anga mahni bial vil tha leh ngaihsak an la awm lo hialin ka hria a. MLA chhuanawm tak tak MNF-in kan nei a, an bial an vil hmeh em em vek mai hi a lawmawm ka ti tak zet a ni,” tiin bial vil tha leh enkawl tha MLA an nih angin an bial theuh mipuite pawhin an MLA-te duhsakna an hlan leh ngeia a rin thu a sawi.
MNF adviser chuan MNF sorkar khan hun khirh tak a tawk chho a, kum 2020 atangin Covid hripuiin a nuai a, khawvel ram ropui ber berte pawh hripuiah khan an mualpho tih sawiin, “Kum thum leh thla hnih chhung zet sorkar pangngai lovin a kal a. Sorkar, kohhran, tlawmngai pawl leh mipuite Covid dovin kan tangrual em em a, a lawmawm tak zet a ni,” a ti.
MNF sorkarin hripui bakah, ramri buai, Zo hnahthlak unau raltlan te, lirnging leh vawk pul hrite avangin buaina nasa tak an tawk bawk tih sawiin, “Hun harsa leh khirh tak tawk mah ila Pathian leh mipuite tanhona zarah mualpho em em lovin kan chhuak a. Hun harsa kan tawk chungin hmasawnna hna nasa takin department hrang hrangin kan thawk theite kha a lawmawm tak zet a ni,” a ti bawk.
Hnam Run-a chhung inkhawm hi Lalringliana, Executive Corporator, AMC-in a kaihruai a ni.