Brazil in FIFA World Cup Qualifier-ah an la tawn ngai loh an tawng a, hei bakah hian khelmual pawn lamah boruak duhawm lo thleng bawkin Argentina nena an inkhel in sawi zui a hlawh hle.
Nilaini zingah Maracana Stadium a inkhelah hian tan hma in Brazil fans leh mikhual team Argentina fans te inkarah buaina a chhuak a. He buaina hi thelh nghal thuai a nih mai loh hnuah a punlun zel a, police lam inrawlh ngai hialin police te hian away fans te an nawr chiam a, hei vang hian Argentina player-te an lawm lo hle.
Inkhelah erawh Brazil hi a vawikhatna atan World Cup qualifier-ah an mual a inkhelah an tlawm a, Nicolas Otamendi goal khung chu sut thei lovin 1-0 in an tlawm.
Brazil hian match 64 an mualah World Cup qualifier khel tawhin vawi 51 an chak bakah draw vawi 13 an nei a, a vawi 65-naah an tlawm a ni.
He inkhelah hian minute 634-naah Giovani Lo Celso corner chu Otamendi-a’n a tauh lut a. Inkhel boruak pawh sangin huntawp dawna Brazil midfielder Joelinton red card pek a nih pawhin sawi a hlawh.
Argentina midfielder Rodrigo de Paul chuan a banah a pawt nasa viau nia a lanlaiin Joelinton zawk hian a pawttu lakah talchhuah a tum a, De Paul hi tlu zuiin referee in red card a phawrh.
Brazil hi tun qualifier-ah hian match ruk an khelh atang point sarih chiah la hmu in parukna an ni a, tling thei dinhmun hniam ber an luah mek.