Israel leh Hamas chuan Gaza-a hren mek mi 50 chhuah nan ni li chhung inkah chawlh turin an inrem.
Inremnaah hian Israeli lung ina Palestinian hmeichhia leh naupang tang 150 chhuah an ni ang a, inkah chawlh chhung hian Gaza-ah puihna tam zawk thawh a ni bawk ang.
Inbeihna hi Ningani zing dar 10:00 (India-a chawhnu dar 1:30) atangin an chawlhsan ang.
US president chuan inremna hi mi hren mekten ‘sawi chhuah theih loh khawp hrehawmna’ an tawrh tihtawpna tur leh ‘pawisawi lo Palestinian chhungkuate tawrhna tihnepna’ tur a nih thu a sawi.
Israeli sorkar hian Hamas hi chhut chimih vek bakah Hamas-hovin Israel chhim lam beia mi 200 chuang an hren chhuahtir chu an tum a ni a. October 7-a ramri kâna Israel chhim lam an rûnnaah hian mi 1,200 chuang an that bawk.
Israel, US leh khawthlang ram chak tak takten firfiak pawla an puan, Hamas-ho hian he inremna hman chhung hi Palestinian-ten Israel-in thlawhna leh lei lama nasa taka a beihna atanga intun dinna tur hun a nih thu an sawi a. Gaza-a roreltute hian beihna an tawhah hian mi 14,000 chuang an thi tawh niin an sawi.
Inkahhai puang tur hian Nilaini tuk khan inbiakna kalpui lai chhunzawm leh a nih hnuah Israel-a tangrual sorkar chuan a pawm thei ta a ni.
Prime Minister Benjamin Netanyahu-a pisa chuan ni li inkahhai puan a nih chhung hian hmeichhia leh naupang 50 chhuah an ni dawn tih a sawi a, hetih hun chhung hian ‘indona chawlhsan a ni ang’ a ti bawk.
Hamas hian mi dang pawh an chhuah zui mai thei bawk a, “Inkah chawlh hi ni khata tihpun a nih chuan mi hren 10 zel chhuah an ni ang,” a ti.
He inremna hi mi hren mek chhungte tana thil pawimawh tak a ni a, a hmain inremna pumhlum ni lo siam a ni ang tih an hlauh thu an lo sawi tawh hlawm a ni.
Mi hren 50 chhuah turte hi hlawm liin, mi 12 zelin Israeli emaw, ram dang mi nihna nei kawp emaw zel chhuah an ni ang a, ram dang an la tel lo.
Chhuah turte hi an hming puan a la ni lo va; mahse, US thuneitu sang pakhat chuan American pathum an tel dawn niin a sawi ve thung a, an zingah hian tun hnaia Kibbutz Kfar Aza-a a nu leh pa an thahsak, kum thum mi, Avigail Idan pawh a tel dawn niin a sawi.
Thawhlehni chawhnuah khan Israeli thuneitu sang pakhat chuan Hamas-te hian Thai 26 pawh an chhuah dawn niin a lo sawi tawh bawk.
International Committee of the Red Cross (ICRC) chuan mi hren chhuahte lo dawngsawng turin an inpeih tih an sawi a. Thla hmasaa Israeli-American hmeichhiate leh Israeli hmeichhe pahnih chhuah a nih tuma mi ang bawka lo dawngsawng turin an thawktute an inbuatsaih.
Israeli sipaite hian Gaza-a beihpui an thlak mekah hmeichhe sipai pakhat an chhanchhuak a, mi hren hmeichhe pahnih, sipai leh civil mi ruang an hmu chhuak bawk.
Israeli sorkar chuan ‘mi hrente an haw vek theih nan a bei zel dawn a, Hamas chhut chimih leh Gaza atanga Israel tiderthawng thei thil tihbo vek a tum’ tih a sawi.
Hamas chuan thuchhuah sei deuh zawk siamin Israeli sipaite hi ‘hudna’ tia an sawi hun chhung hian an chawl dawn tih an sawi.
Drone leh Israeli indo thlawhnate chu Gaza chhim lamah chuan ni li chhung an che dawn lo.
Hetih lai hian hmar lam, Israeli-ten Hamas chhut chimih tuma beihpui a thlakna ber hmunah erawh ni tin chawhma dar 10:00 leh tlai dar 4:00 (India-a chhun dar 1:30 leh zan dar 7:30 inkar) zel chauh chawlh a ni dawn.
Israeli sipai leh an tank-te chu ni li inbeih chawlh lai pawh hian Gaza-a an awmhmun ngaiah an awm reng ang a; mahse, mi an bei lo vang a, an man dawn lo bawk niin Hamas thuchhuah chuan a tar lang.
UNS chuan inbeihna avang hian Gaza-a Palestinian maktaduai 1.7 chuang zetin an in leh lo an tlanchhiatsan tawh niin a sawi a, hengho tan chuan inkahhai puan chhung hi a rei lo hle.
Inremnaah hian ni li chhung hian ni tin puihna phur lorry 200, tuialhthei phur pali leh gas phur loory pali chiah Egypt-a Rafah crossing atangin Gaza-a luh phalsak an ni dawn tho a ni.
Hetih rual hian tuialhthei tam deuh zawk phurh luh tur hi an tan a tangkai dawn tho va; damdawi in generator, tui tihthianghlimna leh bawlhhlawh sawngbawlnaah mamawhna a sang hle tawh a; mahse, inkahhai puan chhung chauh a daih dawn tho a ni.
Israel hian Hamas-ten an beih hnuah khan Gaza-a electric leh tui lak luhna zawng zawng deuhthaw a titawp a; ei tur, tuialhthei leh bungraw lak luh dang pawh a dangchat vek bawk.
Thla khat liam ta chhung khan Egypt kaltlang hian mihring mamawh lorry phur 1,399 chiah luhtir a phal a, indona a chhuah hma zawng kha chuan thla khatah lorry phur 10,000 vel lut ziah ang niin UN chuan a sawi a. Chawlhkar khat liam ta hma zawng phei kha chuan tuialhthei lak luh a phal lo bur a, tuialhtheite hi Hamas-in ruin an sipaite mamawhah an hmang thin niin a puh a ni.
Inremna kalpui chhung hian mipui pawh Gaza hmar lam atanga chhim lama an insawn phalsak an ni dawn a, hmar lam atanga tlanchhe tawh sate erawh an let leh phalsak an ni dawn lo thung.