Aizawl: Kolasib district court-a Fast Track Court chuan hmeichhe tleirawl kum 14 tlan bopuia pawngsualtu, Mangtindam-a chu thiam loh a chantir a, a hrem dan tur chu vawiinah puan a ni ang.
Court thuremnaa tar lan a nih danin Kolasib thlang lawk thingtlang khaw pakhata cheng pa pakhat chuan a fanu kum 14 mi chu Mangtindam-a’n bike-in a tlan bopui hnuah a pawngsual zui nia sawiin November 26, 2020 khan Kolasib Police Station-ah FIR a theh lut a, chumi bawhzui chuan police-ten pawngsualtua puh chu man nghalin, kidnap thubuai Section 363 IPC leh Protection of Children From Sexual Offences Act, 2012 section 6 hnuaiah thubuai ziah luh a ni.
He thubuai khawihtu, Fast Track Court Judge R.Vanlalena chuan nimin khan thuremna hi a puang a. Police chhuina report kimchang te, thuhretu hrang hrang thusawite, ukil-te thusawite a ngaihthlak hnuah Mangtindam-a, Lianthawngthang-a fapa, Khamrang khuaa cheng thin chu hmeichhe tleirawl kum 14 mi a rukbo hnuah a pawngsual ngei tih finfiah a nih avangin thiam loh a chantir.
Mangtindam-a hi District Jail, Kolasib-a tang lai mek a ni a, amah hrem dan tur hi vawiinah ah puan a ni ang.
Pawngsualtu hi POCSO dan ang chuan a rei lo berah pawh kum 20 chhung lung ina tang thei dinhmunah a ding mek a, kipnap thubuaiah pawh pawh hian kum sarih chhung tang thei din hmunah a ding mek a ni.