Aizawl: Special Judge POCSO Act, Champhai chuan a fanu kumtlinglo pawngsualtua puh, Laltlanmawia chu thiam loh a chantir a, kum 20 chhung lung in tang tur leh pawisa chawi turin a hrem.
Court hmaa thu hretute sawi danin Laltlanmawia hian a nupui hmasa nena an inthen hnuah an fanu chu nupuiah a nei zui a, nupuia a neih zui tak a fanu hian a thihsan leh a, a nupuiin a thihsan hnuah an fanu chu a awmpui zui a. March leh October, 2022 chhung khan a fanu kumtlinglo hi tum eng emaw zat mipat hmeichhiatna a hmanpui a ni.
A fanu hian a dam loh avangin damdawi ina a awm laiin amah buaipuitu, a patea hnenah thil thlen dan a hrilh a. Thil thlen dan hi Khawzawl District Child Welfare Committee beng a thlen hnuah Child Welfare Committee (CWC) hian uluk taka a zir chian hnuah, Khawzawl Police Station-ah thubuai an theh lut a. Khawzawl Police-in pawikhawihtua puh, Laltlanmawia hi an man zui ta a ni.
Special Judge Sylvie Zomuanpuii Ralte chuan thu hretute thusawi a ngaihthlak atang leh thil tisualtua puh hi a exam-na atangin Laltlanmawia hian a fanu hi tum eng emaw zat mipat hmeichhiatna a hmanpui ngei tih a finfiahin he thubuaiah hian thiam loh a chantir a, kum 20 chhung lung in tang tur leh Rs 10,000 chawi turin a hrem a. A pawisa chawi tur hi a pe tla thei lo a nih chuan thla khat dang a tan belh leh dawn a ni.
Court chuan CWC-in mi khawngaihthlak leh tanpui ngaite tanpuia an dikna chanvo hailansak tura an hmalakna chu lawmawm a tih thu a sawi a. Mipat hmeichhiatna lama harsatna tawkte pawhin CWC pan nachang hre turin mipuite a ngen a ni.