- Ruata
Sports bike siamtu company lar leh hlun, Japan company tha Yamaha chuan an bike R3 chu India ramah rawn tihchhuah leh an tum a, hemi rual hian Yamaha MT-03 chu tihchhuah an tum bawk a, thla thar December thla tawp lamah hian an hralhchhuah theih beisei a ni.
Yamaha bike lo chhuak tur te hi an tuai thar, model thar a ni dawn a. Kan hriat theuh angin R3 hi chu fully faired sports bike niin MT-03 hi chu naked bike a ni thung a. R3 phelh ruah tih te pawhin MT-03 hi chu a sawi theih awm e. Company lam hian thla thar ni 15 velah hian pekchhuah tan beisei a ni a, an hralhchhuah tan hun tak tur erawh hi chu thla thar thla tawp lam beisei a ni.
Yamaha hian India ramah an bike hrang hrang an hralhchhuak tam hle a. Bike mai bakah scooter te pawh hralhchhuakin India rama lirthei ke hnih nei company awm mekah chuan a hlawhtling ber te zinga mi a ni a. Tunah hian bike lian lam hret huangah hetiang sports bike tha leh mawi kan hmu thar leh tur hi a lawmawm hle a. Heng bike model pahnihte hi chu thalaite awh leh nghahhlelh a ni hrim hrim a. Thalai mai bakah sports bike lam tuipuitute tan chuan thu lawmawm tak a ni awm e.
Yamaha atanga bike thar lo chhuak tur pahnih R3 leh MT03 hi kumin July thla khan Madras International Circuit-ah phochhuah a lo ni tawh a. Tunhnai lawka neih zawk tak Indian MotoGP-ah pawh an phochhuak nghe nghe a ni. Hei hian India rama tlangzarh hnaih tur a nih zia te pawh a pholang thei ang a. Engpawh ni se company lam atang pawhin thuchhuah chiang leh kim zawk kan hla hre chho zel dawn niin a lang.
Media report thenkhatin an tarlan danin heng bike thar pahnih lo chhuak tur hi India ram khawpui hrang hrang zahnih chuanga an showroom-ah te pekchhuah a ni dawn a. Yamaha showroom – Blue Square Yamaha dealer te atanga hralhchhuah bik a ni dawn a ni.
India rama Yamaha dealer tlemte chuan heng bike thar tur pahnihte hi booking an ti thei tawh a, book nan hian Rs. 5,000 chawi a ngai a. Heng bike te hian khawl lian leh chak tha tak, 321cc, liquid-cooled, parallel-twin engine an hmang dawn a. He khawl hian power lamah chuan 42bhp chu 10,750rpm-ah a pechhuak thei ang a, peak torque 29.5Nm chu 9,000rpm-ah a pechhuak thei dawn bawk a ni. He khawl hi 6-speed gearbox nen thlunzawm a ni a. Bike chak tha leh mawi, thalai tam tak awh rawn a rawn ni ngei dawn a ni.
Diamond-type frame nghahchhana duan niin heng bike pahnih Yamaha R3 leh MT-03 te hian suspension lamah upside down front fork leh rear monoshock te an hmang dawn a. A hmaa R3 chhuak thin khan telescopic fork pangngai a hmang thin a ni. R3 thar seat san zawng hi 780mm niin a ground clearance hi 160mm a ni dawn a. 1380mm wheelbase neiin a rihzawng (kerb weight) chu kg 169 a ni dawn a ni. 17-inch alloy wheel hmangin 110/70 leh 140/70 section tyre chu a indawt danin hian a hma leh hnungah a hmang dawn a ni.
Yamaha MT-03 thar hi kan tarlan tawh ang khan a awmzia takah chuan R3 naked version a ni deuh ber a. LED projector headlight with LED DRLs, tank design mawi tak, USD front forks leh rear monoshock te a nei ang a. Bike pahnih hian braking lamah chuan a hmalamah 298mm leh a hnung lamah 200mm disc te a hmang dawn a, dual-channel ABS a awm dawn bawk a ni.
Heng bike pahnihte hi CBUs (Completely Built-Up Units) anga a rawn kal dawn avangin a man a tlawm vak loh a rinawm a. Yamaha R3 hian a el theih tur ho nia lang chu KTM RC390, Kawasaki Ninja 300 leh Ninja 400 te a ni ang a, MT-03 ve thung chu KTM Duke 390 thar te nen pawha inel thei tura beisei a ni.