Aizawl: Central YMA Vice President Prof Lalnuntluanga chuan YMA-ah mi mal hlawkna zawn a remchan loh thu leh YMA chu pressure group a nih loh thu a sawi.
YMA Sub Hqrs., Lunglei chuan nimin khan an dinchamphak vawi 50-na, golden jubilee chu Convention Centre, Lunglei-ah an lawm a. He huna khuallian, Central YMA Vice President Prof Lalnuntluanga chuan YMA chu pawl thianghlim, politics rawngkai lo, Pathian hriatpuia din a nih thu a sawiin, “YMA chu Pathiana innghat, vantlang inzirna hmunpuia hnam nun ziarang nghet, tlawmngaihna lungphuma innghat a ni a, mi tin kan leng vek a ni,” a ti.
YMA-ah mi mal hlawkna zawn a remchang lo tih sawiin Prof Lalnuntluanga chuan, “YMA chu pressure group a nih loh bawk avangin, sorkar hmalakna dodal zawnga chet te a remchang lo a. Sorkar finchhuah leh thawhpui chu a tih tur a ni,” tiin, YMA chu tanpui ngaite tanpuitu a ni tih hre thar tur leh, midangte tanpui kawngah ke an pen zel a ngaih a thu a sawi.
Prof Lalnuntluanga chuan, “Kan ramin harsatna chi hrang hrang a tawh chang leh thil thleng lian tham a awm changa YMA chu sulsu tura a kipui pawimawh tak kan nih ve fona chu, kan hruaitu hmasate thawhrah a ni a,” tiin, thangthar zawkte pawhin YMA tobul leh din a nihna chhan te ngaihtuah let turin a chah.
Golden Jubilee lawmna inkhawm hi YMA Sub hqrs., Lunglei Vice President CMS Dawngliana’n a kaihruai a. Khuallianin YMA Sub Hqrs Lunglei Golden Jubilee puala buatsaih Souvenir a tlangzarh nghal bawk a. YMA Sub Hqrs Lunglei President K. Lalfakzuala’n Golden Jubilee lungphum a hawng bawk.
YMA Sub Hqrs Lunglei hnuaiah hian tun dinhmunah branch 134 awmin, member 50,103 an awm mek a ni.