Iraq rama ISIS firfiak pawl vanglai a ni a. Kum 2015, August thla khan, tuk dang ang bawkin khua a thain a lum viau a, Sinjar district-ah pawh Muslim-te chawnghei tawp ni lawmin thian tha leh chhungkhat lainaten induhsak tawnin chithlum insemin an inchibai nawk nawk hlawm a.
Chutih lai chuan chung lam atangin beitu an rawn lang thui a, mipa rothap hmel tak tak, ralthuam tha pui pui nen an rawn lang nghal a. Hetih lai hian Laila Talo Khuder Alali chu kum 26 chauh a la ni a. ISIS firfiakten Kurdistan-a an khua, Kocho an lo luh ni chu August 3, 2014 a ni a. He ni atang hian firfiak pawl rawng tak takte chuan an hnam, Yazidi an tihte chu nasa tak maiin an sawisa a, ani pawh an hmauh bik lo.
Beih an tawh chiah chuan Laila chu a fate pahnih, a pasal leh a chhungte dang nen baklengin hmun himah an insaseng nghal a; mahse, a tuk zingah erawh chuan an vaiin, mi 19 chu man an ni a, firfiakte chuan a nu, a nutate 6, a unau dangte chu an that a, ani erawh zawrh atan an hreng ta thung a ni.
Him taka firfiakte kut atanga a chhuah hnuah Laila chuan, “Kum hnih, thla 8 leh ni 6 chhung,” tiin sal (sex slavery)-a a tan chhung chu a sawi a. Hetih chhung hian a duh duhin, a ngam huai huaiin an mutpui a, hmun hrang hrangah hralh chhawn a ni a, ramri pawh tum kua zet kânin an hralh tih a sawi a, pawngsual rawn a ni nual bawk tih a sawi.
Khawvel hian Laila chanchin chu a hre lo hle a, tun hnaiah ama tawh ang bawk tawk, a chhuah hnua hetiang tawkte tana thawktu, Nadia Murad chuan Nobel Peace Prize a dawng ta a. Nadia pawh hi ISIS firfiakten Mosul khawpuia kum 2014-a an man, thla thum chhung an hren hnua tlan chhuak, Iraq-a hnam tlem tlem tak, Yazidi tana thawktu a ni zui ta a ni.
Harmony Foundation dintu leh an chairman, Abraham Mathai chuan Lalla chungchang hi sawiin, “Khawvelin Nadia chanchin chu a hre tawh a; mahse, Laila anga nasa taka tuar tam takte chanchin erawh hriat loh tam tak a awm,” a ti a. Laila hi an foundation hian ISIS firfiakten sex slavey-a tang mekte chhanchhuah an nih theih nana hna a thawh avangin chawimawina (award) an hlan ve bawk a ni.
Laila hi tunah chuan kum 30 a ni tawh a, “Syria, Iraq, Saudi Arabia, Baghdad leh hmun hrang hrangah kalpui ka ni a. A chang chuan chawlhkar khat zet ngaihsak lova awm chang te ka nei a, min hralh a, a nih loh leh, thilpek atan min hmang a. Min lei duh mai an awm loh chang phei chuan ISIS firfiakten nawmchen nan min hmang mai thin a ni,” a ti.
Laila hi rescue team-in Kurdistan Regional Government puihnain motorbike hmangin an chhan chhuak a. Tunah hian Sharia Camp, Duhok Kurdistan-ah a fapa, kum 7 mi leh a fanu, kum 5 mi nen an awmho va. Nikum khan a nuta nen a chanchin hi lehkhabu an ziak nghe nghe.