Mizoram State Assembly inthlanpui neiha vote tlate chu dodalna karah December 3, 2023 (Pathianni)-a chhiar turin inbuatsaihna kalpui mek zel a ni.
Nilaini khan Lawngtlai district huam chhunga assembly constituency pathum – Tuichawng, Lawngtlai East leh Lawngtlai West-a vote tlate chhiar tura ruat, counting official-te thutna tur ruahmanna chu NIC Conference Hall, Lawngtlaiah Joseph H. Lalramsanga, District Election Officer hovin neih a ni.
Lawngtlai district chhunga vote tla chhiarna tur hian Govt. Lawngtlai College-ah counting centre pathum ruahman a ni a. Vote chhiarna dawhkan hi a vaiin 39 ruahman niin, returning officer table leh observer table-a vote chhiarpui tura ruat, counting supervisor, counting micro observer leh counting assistant atan mi 187 ruat an ni.
Joseph H.Lalramsanga chuan Lawngtlai district-a vote chhiarna neih tur chu felfai tak a kalpui a nih theih nan counting official-a ruatte chuan training an ngaih pawimawh a tul thu a sawiin, thawhhona tha tak hnuaiah training kalpui turin kal khawmte a chah bawk.
Kolasib district chhunga assembly bial pathum – Tuirial, Kolasib leh Serlui biala vote tlate chhiar huna vote chhiar enpui tura ruat, micro observer-te tan nimin khan I&PR Conference Hall, Kolasib-ah training vawi khatna buatsaiha ni bawk.
He training hi Kolasib District Election Officer John LT Sanga chuan a kaihruai a. Vote chhiar chu inthlan kalpuinaa a hmawrbawkna leh inthlan hlawhtlinna lan chhuahna a nih angin a pawimawh hle tih a sawi a. DEO chuan vote chhiar tura inpuahchahna ngawrh takin a kalpui mek thu a sawi.
Ruahman lawk dan chuan Kolasib district chhunga assembly bial pathuma vote tlate hi Government Kolasib College-a counting hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian EVM-a vote tlate chhiarna tur dawhkan 10 theuh bakah, postal ballot vote tlate chhiarna tur dawhkan pakhat theuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni.