Kumin MLA inthlanpuia Siaha biala BJP candidate Dr K Beichhua chuan Mizoram State Assembly inthlanpui neihah BJP tel ngei ngeina sorkar a piang dawn niin a sawi.
Nimin khan BJP chuan an party pisa, Mipui Run-ah Friday Political Session hun an hmanah thu sawiin Dr K Beichhua chuan, political party dang chu sorkar chakin an tui hal a, mahnia sorkar turin inngai theuh mah se, neutral leh intellectual lamte erawh chuan a mala sorkarna siam an awm an rin loh thu an sawi avangin BJP chu a mala sorkarna siam thei ni lo mah se, Mizorama sorkar thar lo piang turah erawh an tel ngei a rin thu a sawi.
Dr K Beichhua chuan BJP-a a zawm chu Pathian remruat dik tak, Pathianin a hruaina a nih thu sawiin, “Mahni mamawh petute do hi mifing tan chuan tih chi a nih loh avangin kan thawhpui thiam mai tur a ni a, a mamawh tute zawk kan lo induh tlat chuan a fuh thei lo a ni. Chuvangin, BJP hi central-ah rei tak chu la sorkar tura rin a ni,” a ti.
Central sorkarah tho Mizoram mamawh thlenna tur a nih avangin BJP hi Mizoram mamawh a ni tih hi a chian avangin, kum 2024-ah hian BJP telna sorkar hi a piang ang a, Mizoramah hmasawnna pawh nasa zawkin a lo thleng ngei dawn niin a sawi bawk.