Aizawl: MPCB Conference Hall, MINECO, Khatla-ah nimin khan ‘Northeast Yatra for Lifestyle (LiFE) in Mizoram’ hawn a ni.
He hunah hian Er. C. Lalduhawma, Member Secretary, Mizoram Pollution Control Board chuan Environment humhim leh venhim kawnga hma la nasa turin mipui rilru kaihthawh a, a zau thei ang bera tidarh turin kal khawmte a fuih a. Single Use Plastic khap chungchangah pawh a bul tantu ni tur leh mi dangte zirtirna pe turin kalkhawmte hnenah ngenna a siam nghal bawk.
Hun kaihruaitu, Er. Benjamin Lalnunsanga Colney, Programme Officer, Mizoram EIACP Hub – Mizoram Pollution Control Board chuan Mission LiFE (Lifestyle for Environment) chungchang leh Northeast Yatra for Lifestyle Mizorama kalpui a nih dan turte sawifiahin Yatra programme-in a tum ber chu environment him leh tlo zawk kan neih theih nan mi tinte’n kan nunphung pangngai kalsana environment tana tha zawk nunphung thlang tura inzirtir a ni tih a sawi.
District hrang hranga Yatra kalpui dan tur power point presentation hmangin C. Malsawmzuali, Scientist ‘B’-in hrilhfiahin Yatra Kick off Programmme hi district hrang hranga Yatra Team-te’n online Google Meet kal tlangin an lo chhim ve bawk a ni.
Northeast Yatra for Lifestyle (Life) hi Northeast state pariatah November thla chhung hian neih tur a ni dawn.