- Dr. C. Lalrampana
A KAMKÊUNA
Zu hi a hlut vang nge Mizote hian kan buaipuina a rei ta hle mai! Messia lokaleh hun thlengin kan buaipui dawn a nih hmel hle. Achangin kan khap bur a, achangin kan chhuah zalenin kan zuar a; achangin kan sawi mawi a, achangin kan sawihnãwm thul. Hringmi ianga chhia leh tha hria ni phei se’ng chuan Mizote zinga awm hi a ning viau ta ve ang. MNF rammut lai phei kha chuan silai nena vaukhan chunga khap hun laite kha a awm a, mahse, tun thlengin khap rem theih a ni chuang lo. Zu khap burna dan siamin “dry Mizoram” kan ti thul mahse, a rukin a huangtàu tulh tulh zawk niin a lang. Amah hmangangaiha a zuna uai laklawhte lahin bansan ahnekin a tãngnemah an bei laklawh ni ngei tur a ni; kiss satliah mai duh tawk lovin a dutin an dut ngawr ngawr ni ta berin a lang. A sakhming pangngai “K. chuang Biaksailovi” tih thin lah chu tunah chuan an ko duat lutuka “Amawii” tiin a sakhming mawi zawkin an thlak (nomenclature) lehnghal emawni? An duat tulh tulh ni berin a lang. A ngaina zual phei chuan an nupui fanaute bula awm aiin Amawii bula awm nuam an ti zawk a, zing thawh veleh atangin nileng zankhuain an rimin an thutchilh thin a ni awm e. A ngainatawm viau a ni mahna.1 Tim 5:23 Tui chauh in mi ni tawh suh la, i pum avang leh i dam loh fo avangin uain tlem te hmang thin ang che. tih ziak hi an chhiar fuh mial a ni mahna?
ZU CHIHRANG HRANG CHU?
Zu han tih ringawt hi chuan eng zu ber nge hriat a har hle. Zu chihrang hrang a tam hle a. Zu tha chi, mihausa leh neinung deuhina an in chi phei hi chu a thain chihhrang a tam hle a; Mizote hmuh phak tawk tun hma atanga kan ngainat leh in thinah chuan Zupui, zufang, tinzu, rakzu tiin a hming hrang hrang kan phuah a. An in hun leh hmun azirin hahzu, lawm zu, nau zu, zu lawm, mual zu, sakhi zu, sumdeng zu titein an phuah kawileh duah bawk a ni . Sãp zu kan tih phei hi chu chihrang a tam hle a; hawiher tihzauh nan tlem tarlang ila. Sap zu (liquor) kan tih hi spirit thlitfim, brandy, theirah leh ramhmul, chinite nena chawhpawlh alcohol 2 ½ % emaw a aia tam emaw nena um hmina thlawr fim hi a ni. Hengte hi brand hrang hranga vuah a ni a, chungte chu-rum, whiskey, gin, brandy, cognac, vodka, tequila-te a ni. Rum zu bik ringawt pawh hi chihrang 16 lai a aawm a; khawvel huap phei chuan ram hrang hrang zute hi kan sawi seng lovang. Khawve ram hrang hrangte hian an rama theirah leh ramhmul atangtein zu tha tak tak an siam chhuak a, a siamtu phalna (permit) an pekte hi an vil (monitor) reng a; zu tha lo siamtute man an nih chuan an permit tihtawpsak emaaw lung in tan thlengin na taka hremna dan tha tak an nei a; a intute pawh nunphung pangngai baka khawsa thinte chu na taka hremna neiin an kalpui mai tthin a ni.
ZU SIAMNA HMUN
Phai ram atanga lakluh sãp zu company-in an siamsa tih loh helai tualchhunga kan siam chawp rakzu hi Phunchawng, Rangvamual ram leh thingtlang zu factory siamna hmun hrang hranga siam tih loh chu Sãp zu man to pui pui a chang changa mi naranin an in ve zauh thinte hi kan zu hmuh theihte an ni a. MLTP Act, 1995 kalpui a nih hnuah The Mizoram Liquor Prohibition and Control Act 2014 kan kalpui leh a, tunah hian the Mizoram Liquor (Prohibition) Act, 2019 kan hmang mek a; mahse, zu khap rem hi zawng a harsa a niang, tun thlengin a la tam reng niin a hriat theih. Dãn chu a lo awm veleh sual chu a lo harh a…tih ang mai khan dãn chu kan nei tha a; dãn siamtute pawhin an hahpui thin nangiang reng a; mahse, dãn zãwmtu tur mipuite hian dãn kalha chet hi nuam kan ti sauh zawk em ni tih theih turin zu leh ruihhlo dangte hi kan buaipui tulh tulh ta niin a lang.
A TLANGKAWMNA
Nov. 20, 2023 khan Central YMA hruaitute leh MJA-te chuan tunlai ruihhlo leh abikin zu thunun dan chungchang YMA Office Tuikhuahtlangah an thlirho tih hriat a ni a. He inkawmhonaah hian CYMA President Pu Lalhmachhuana chuan Phunchawng leh Rangvamuala zu factory tam lutuk chu a ngaimawh hle tih a hriat theih a; ngaimawhawm tak leh lu tihai tak a tling reng a ni. Amaherawhchu, zu khapna dan kan siam leh hman tawh leh hman mekte hi a kengkawhtu sorkar hian theihtawp chhuah mah se, a hlawhtling êm êm lo tih chu a taka hre vektu kan ni. A chhan chu khaawvel a la ni a; dãn kengkawhtu leh dan lek kawhtute zingah pawh zu ngawl vei leh zu in ve duh tho tam tak an awm niin a lang a; tin, a mantute zingah pawh an mansa hralh ru veleh chhãwng duh an awm veleh zel tho nia sawite pawh a awm zel a. Tin, dan bawhchhiate hremna hi a nepin Sorkar hnathawk aikal la ang thovin zu neitu jail tãn ai tãnsak theih a nih hmel a. Mi tãn ai tãngte hian hlawh tha tak, an tan hun chhung tur azirin an nei a nih phei chuan Zu factory neitu leh zu siamtute hian vawi tam tak mansak an nih hnuah pawh an hna hi chawlhsan an phal hauh lo tihna niin a lang. Heti taka zu factory a tam belha khap rem tak tak theih loh a nih si chuan Zu factory mana tichhe thintute hian an zu siamah enge an telh? Mihring hriselna leh nunna atana hlauhawm thil an telh em? tih chiang taka hriat a nih theih nan laboratory test nei nghal zel turin Health Department lamah pe chhawng se, laboratory test paltlang thei lo khawpa chhiatna thlentu Zu factory neitu apiang chu an phu tawk hremna pe hmiah hmiah zel se. Zu factory hi a rem mai lo a nih pawhin zu tha hlir siama quality control theih a nih chuan Sãp zu duh duha in pha velote pawh hian heti tak hian zu hi an chhiaatpui lovang a, ‘Zu factory tha mi’ hlir kan nei mai dawn a lo ni reng mai.