India hmar lam, Uttarakhand-a leiverh chima tang thawk mi 41 chhanchhuah hna chu leiverhna khawl (drilling machine)-in harsatna a neih avangin chawlhsan leh rih a ni.
US siam khawl hi leiverh hnawhtu verh nana hman niin verh tlanga mi tangte lak chhuahna tur siam tuma hma lak a ni.
Thuneitute chuan khawl hi siam that a ni a, Zirtawpni khan hman chhunzawm leh a ni.
Tang mekte hi lei minin an awmna leiverh a hnawh avangin ni 12 zet an tang ta.
Himalaya tlangdunga Silkyara leiverh hi km 4.5 tur niin November 12 khan lei min tla hian a hnawh a ni.
An tan hnu lawkah mi tangte hi biakpawh theih zui nghal an ni a, oxygen, ei tur leh tui pek reng theih an ni bawk.
Chhanchhuah hna thawktu hotute chuan Ningani tukah khan lak chhuah theih hman an inbeisei a; mahse, khawl lam chiang lo avangin verh hna chawlhsan leh rih a ngai ta a ni.
Chhanchhuah hna thawh mekah hian prime minister pisaa advisor thin, Bhaskar Khulbe chu thawktu zingah hian telin drilling machine thlawptu platform chu a chak lo va, Nilaini zan zankhua leh Ningani nileng khan siam a ngai tih thuthar lakhawmtute hnenah a sawi.
Zirtawpni khan sorkar chuan platform hi concrete hmanga siam that niin khawl pawh remkhawm leh theih a ni dawn tih a sawi.
Khawl hmang hian lei leh lung tla metre 60 vel zet verh tlang tum a ni.
Thuneitute hian pipe intiat lo chi hrang hrang rawlh luha leiverh te deuh zawk siama thawktu tangte an chhuah theihna siam an tum a ni.
Ruahman dan chuan pipe chhungah hian nawrlirha hlang chungah mi tangte hi lak chhuah tum a ni.
Hetih lai hian lei tla, a hnawhtu zingah hian lung, thir leh thil sakhat tak tak a tam avangin verh hna thawh a hautak hle.
Beihpui thlak mekna hi Nilaini pawh khan khawlin thir chhah tak a tawn fuh avangin chawlhsan a ni a, gas cutter hmangin tan hna thawhsan leh rih a ni.
Chhanchhuah hna thawktute a hnawhtu zinga hmun lia thena hmun khat chu an verh tawh a; mahse, a bak la awm hi engtianga rei nge verh la ngai dawn an sawi thei tawh rih lo.
Ningani khan National Disaster Response Force (NDRF) member, Lieutenant General Syed Ata Hasnain chuan ‘beihpui an thlak mekah hian hun hi sawi lawk a har’ niin a sawi.
“Thawktuten a verh hna an thawhah hian eng nge an tawn tihah a innghat tawp mai a ni,” a ti.
Leiverh lama mi thiam, chhanchhuah hna thawhnaa puitu, Arnold Dix chuan ni tam tak hman a nih avangin khawl chhia avangin vawi thum lai hna a khaihlak tawh tih thuthar lakhawmtute hnenah a sawi bawk.
“An tanna atanga bus sei zawng ang vel kan thleng tawh,” a ti a. “Tukinah khan kan inhmuh theih tawh kan inbeisei kha a ni a; mahse, he tlang hian ngaihdan a lo thlak a nih hmel hle a ni,” tiin a sawi bawk.
Heng lai tlangram hi lei min leh lirnghing a thlen duhna lai a ni bawk a, hei hian chhanchhuah hna thawh hi a timuang lo thei lo bawk.
Hetih lai hian leiverh pawnah hian a tula hman theih turin ambulance inrintir reng a ni tawh a. Thuneitute hian him takin tangte lak chhuah an tum a, an lo chhuah veleh a rang thei ang bera an hnaih damdawi in panpui nghal an tum a ni.